Drone Seed Ball Plantation: पशुपालकांसाठी दिलासादायक बातमी; ड्रोनने केली चाऱ्याची पेरणी, वन विभागाचा अनोखा प्रयोग

रामटेक : पर्यावरण संरक्षण, गवताळ क्षेत्राची निर्मिती आणि पशुधनासाठी उच्च दर्जाचा चारा उपलब्ध करून देण्याच्या उद्देशाने वन विभागाने ड्रोनच्या साहाय्याने 'सीड बॉल' पेरणीचा एक अनोखा प्रयोग सुरू केला आहे. रामटेक तालुक्यातील नवेगाव-संग्रामपूर येथील झुडपी जंगल परिसरात या उपक्रमाचा प्रारंभ राज्यमंत्री ॲड. आशिष जयस्वाल यांच्या हस्ते करण्यात आला. या प्रयोगात रामटेक परिसरातील सुमारे पाच एकर क्षेत्र निश्चित करण्यात आले आहे. येथे ड्रोनच्या माध्यमातून गवत आणि विविध फळझाडांच्या बियांचे 'सीड बॉल' हवेतून पसरविण्यात येत आहेत. बियांना मातीचा संरक्षक लेप दिल्यामुळे त्यांचे संरक्षण होऊन योग्य वातावरण मिळाल्यास उगवण होण्याची शक्यता वाढते. वन विभागाच्या अधिकाऱ्यांनी स्पष्ट केले की, हा प्रारंभिक स्वरूपातील प्रयोग असून पुढील काही दिवसांत त्याचा आढावा घेऊन त्याचे निष्कर्ष जनतेसमोर मांडले जाणार आहेत. प्रयोग यशस्वी ठरल्यास वनक्षेत्राबरोबरच इतर शासकीय मोकळ्या जमिनींवरही अशाच पद्धतीने मोठ्या प्रमाणावर चारा लागवड करण्याचा विचार आहे. यावेळी बोलताना राज्यमंत्री ॲड. आशिष जयस्वाल यांनी सांगितले की, दर्जेदार चारा उपलब्ध झाल्यास पशुधनाचे आरोग्य सुधारेल, दूध उत्पादनात वाढ होईल आणि ग्रामीण अर्थव्यवस्थेलाही बळकटी मिळेल. पर्यावरण संवर्धन, चारा निर्मिती आणि मानव-वन्यजीव संघर्ष कमी करण्यासाठी हा प्रयोग महत्त्वाचा ठरेल, असा विश्वास त्यांनी व्यक्त केला. राज्यातील शासकीय मोकळ्या जमिनींवर मोठ्या प्रमाणावर चारा विकसित करण्याचा शासनाचा संकल्प असल्याचे त्यांनी स्पष्ट केले. महसूल विभागाच्या जमिनी महिला बचत गटांना प्रतीकात्मक एक रुपया वार्षिक भाडेपट्ट्यावर उपलब्ध करून देत त्या ठिकाणी चारा लागवड करण्याची योजना राबविण्यात येणार असल्याची माहिती त्यांनी दिली. या कार्यक्रमाला नागपूर वन विभागाचे वनसंरक्षक गुरुप्रसाद, उपवनसंरक्षक डॉ. विनिता व्यास, सहायक वनसंरक्षक गोविंदा लुचे, वनपरिक्षेत्र अधिकारी राहुल शिंदे, सागर बनसोड, शेषराव तुले, शिवसेना तालुकाप्रमुख विवेक तुरक, माजी जिल्हा परिषद सदस्य संजय झाडे, सरपंच शरद डडुरे, पोलिस पाटील प्रभू गोंगले, माजी सरपंच भगवंता गोंगले, नितीन गेडाम, बाल्या मासूरकर, ड्रोन चालक साहिल केळकर, वन विभागाचे कर्मचारी तसेच ग्रामस्थ मोठ्या संख्येने उपस्थित होते. ड्रोन तंत्रज्ञानाच्या मदतीने वनक्षेत्रात बीजरोपण करण्याचा हा उपक्रम राज्यातील पर्यावरण संवर्धन आणि शाश्वत चारा व्यवस्थापनाच्या दृष्टीने महत्त्वपूर्ण मानला जात असून, त्याच्या यशस्वी अंमलबजावणीकडे वन विभागासह पशुपालकांचेही लक्ष लागले आहे.