Tragic Football Incident: थायलंडमध्ये वीज कोसळून खेळाडूचा मृत्यू

थायलंडमध्ये फुटबॉल सामन्यादरम्यान एक अत्यंत दुर्दैवी घटना घडली आहे. सामना सुरू असताना एका खेळाडूवर वीज कोसळल्याने त्याचा मृत्यू झाला. या घटनेत इतर १२ जण जखमी झाले आहेत. मंगळवारी (४ ऑगस्ट) संध्याकाळी थायलंडच्या नराथिवात प्रांतातील सुंगाई गोलोक शहरात हा अपघात झाला. पोलीस प्रमुख थुन सिरिखुंत यांच्या माहितीनुसार, मुसळधार पावसात सायंकाळी ५.३० वाजता हा अपघात घडला. सांतिफाप स्टेडियमवर प्रादेशिक गोलोक एफए कप फुटबॉल स्पर्धेचा उपांत्य सामना सुरू होता. अचानक विजेचा कडकडाट झाला आणि मैदानावर उपस्थित खेळाडू आणि इतर व्यक्तींना विजेचा फटका बसला. या घटनेमुळे परिसरात एकच खळबळ उडाली. जखमींना तातडीने रुग्णालयात दाखल करण्यात आले. हा सामना अबू x नोंग सिरिन आणि SAMCOLT या संघांदरम्यान खेळला जात होता. SAMCOLT हा थायलंड आणि मलेशियातील खेळाडूंचा मिश्र संघ आहे. पोलीस प्रमुखांनी सांगितले की, गोलोक एफए कप स्पर्धेत केलांतन एफसीसारखे इतर मलेशियन संघही सहभागी आहेत. सुंगाई गोलोक हे शहर थायलंड आणि मलेशियाच्या केलांतन राज्याच्या सीमेच्या जवळ वसलेले आहे.

या घटनेत मृत्यू झालेल्या खेळाडूची ओळख २४ वर्षीय सोफवान अवे अशी पटली आहे. तो थर्ड टियर क्लब याला एफसीचा विंगर होता. थाई एनक्वायररच्या वृत्तानुसार, सोफवान अबू x नोंग सिरिन संघाकडून खेळत होता, मात्र याबाबत काही परस्परविरोधी माहिती समोर आली आहे. सोफवान यापूर्वी पट्टानी एफसीकडून खेळला होता आणि घटनेच्या काही दिवसांपूर्वीच त्याने याला एफसीसोबत करार केला होता. मंगळवारी सायंकाळी सुमारे ५.३० वाजता थाई पोलिसांना आपत्कालीन कॉल मिळाला आणि त्यांनी तातडीने घटनास्थळी धाव घेतली. तेथे सोफवान गंभीर अवस्थेत आढळून आला. मलेशियन वृत्तसंस्था बर्नामाने दिलेल्या माहितीनुसार, पोलीस प्रमुख थुन सिरिखुंत म्हणाले, “आपत्कालीन वैद्यकीय पथकाने त्याला वाचवण्यासाठी सर्वतोपरी प्रयत्न केले, मात्र या घटनेत झालेल्या गंभीर दुखापतींमुळे त्याचा मृत्यू झाला.”