Action Against Illegal Constructions:अनधिकृत बांधकामांवर सिडकोचा बुलडोझर; द्रोणागिरी, कामोठे ते विमानतळालगतच्या परिसरात सलग कारवाई

नवी मुंबईतील सिडकोच्या मालकीच्या भूखंडांवर अनधिकृत बांधकामे आणि अतिक्रमणांविरोधात सिडकोने कठोर कारवाई सुरू केली आहे. द्रोणागिरी, कामोठे, तरघर ते उलवे प्रवेश पूल आणि नवी मुंबई आंतरराष्ट्रीय विमानतळालगतच्या परिसरात सिडकोने सलग पाडकाम मोहीम राबवली आहे. या कारवाईत अनेक पक्की बांधकामे, गॅरेज, ढाबे, दुकाने आणि स्टॉल्ससह रस्ते व पदपथांवरील सुमारे ५० टपऱ्या हटविण्यात आल्या आहेत. याशिवाय अनधिकृत वाहनतळांवरही कारवाई करून अवजड वाहने भूखंडाबाहेर काढण्यात आली आहेत. या कारवाईमुळे स्थानिक नागरिकांमध्ये आनंद व्यक्त केला जात आहे, कारण अनेक वर्षांपासून या अतिक्रमणांमुळे त्यांना अनेक समस्यांचा सामना करावा लागला होता.

सिडकोच्या अनधिकृत बांधकाम नियंत्रण विभागाने ५ ऑगस्ट रोजी द्रोणागिरी नोडमधील सेक्टर एक, भूखंड क्रमांक ५९ येथे कारवाई केली. या ठिकाणचे सुमारे ७० चौरस मीटर क्षेत्रफळाचे पक्के वीट बांधकाम, पत्र्याच्या शेडमधील गॅरेज आणि ट्रक पार्किंग हटविण्यात आले. त्याचबरोबर सेक्टर ४७ आणि ५० मधील रस्ते व पदपथांवरील ४० ते ५० कच्च्या-पक्क्या टपऱ्यांवर जेसीबीच्या साहाय्याने कारवाई करण्यात आली. कामोठे नोडमध्येही त्याच दिवशी मोठी कारवाई करण्यात आली. सेक्टर २४ मधील भूखंड क्रमांक १६ लगतच्या जागेवर अनधिकृतपणे उभी करण्यात आलेली अवजड वाहने टोईंग करून बाहेर काढण्यात आली. या कारवाईत एक गॅरेज आणि टायरचे दुकानही पाडण्यात आले.