New Regulations for Feeding Stray Dogs:भटक्या कुत्र्यांना खाऊ घालण्यासाठी नवीन नियम लागू

भंडारा : राज्यात भटक्या कुत्र्यांच्या वाढत्या समस्येवर नियंत्रण ठेवण्यासाठी सुप्रीम कोर्टाच्या आदेशानुसार राज्य शासनाने कठोर मार्गदर्शक सूचना जारी केल्या आहेत. या सूचनांनुसार, आता रस्त्यावर किंवा सार्वजनिक ठिकाणी भटक्या कुत्र्यांना खाऊ घालण्यासाठी नगरपालिकेची परवानगी घेणे आवश्यक आहे. यामुळे नागरिकांना भटक्या कुत्र्यांच्या उपद्रवापासून संरक्षण मिळेल, असे मानले जात आहे. विशेषतः शाळा, रुग्णालये, बसस्थानके आणि धार्मिक स्थळे यांसारख्या संवेदनशील ठिकाणी भटक्या कुत्र्यांना पकडून त्यांना पुन्हा त्याच ठिकाणी सोडण्यास बंदी घालण्यात आली आहे. यामुळे भटक्या कुत्र्यांच्या समस्येवर एक स्थायी उपाय सापडेल, अशी आशा व्यक्त केली जात आहे. प्रशासन या नियमांची किती काटेकोरपणे अंमलबजावणी करेल, याकडे सर्वांचे लक्ष लागले आहे.

शहरातील भटक्या कुत्र्यांची संख्या वाढत चालली आहे, ज्यामुळे नागरिकांमध्ये दहशतीचे वातावरण निर्माण झाले आहे. रात्रीच्या वेळी दुचाकीस्वारांना भटक्या कुत्र्यांचा त्रास सहन करावा लागतो, तर लहान मुलं आणि वृद्ध व्यक्तींवर अचानक हल्ले होण्याच्या घटनाही वाढल्या आहेत. यामुळे नागरिकांनी प्रशासनाकडे तात्काळ ठोस उपाययोजना करण्याची मागणी केली आहे. भटक्या कुत्र्यांच्या समस्येवर लक्ष देण्यासाठी नगरपालिकेला २४ तास कार्यरत असणारी विशेष हेल्पलाइन सुरू करावी लागणार आहे, ज्यामुळे पिसाळलेले कुत्रे किंवा श्वानदंशाच्या घटनांची माहिती तात्काळ प्रशासनापर्यंत पोहोचेल.