Protest Against Mixopathy: डॉक्टर संघटनेचा सरकारला सल्ला

वर्धा : इंडियन मेडिकल असोसिएशन (IMA) ने आंदोलन सुरू केले आहे, ज्यामुळे आरोग्यसेवा ठप्प होण्याची शक्यता आहे. यामुळे रुग्णांची स्थिती गंभीर होऊ शकते आणि डॉक्टरांवर आरोप होऊ शकतात. या पार्श्वभूमीवर, डॉक्टर संघटनेने आपली भूमिका स्पष्ट केली आहे. महाराष्ट्रातील IMA, MARD, ASMI आणि इतर वैद्यकीय संघटनांनी एकत्र येऊन या आंदोलनाला पाठिंबा दिला आहे. संघटनेने स्पष्ट केले की, IMA कोणत्याही वैद्यकीय पद्धतीच्या विरोधात नाही. आयुर्वेद, होमिओपॅथी, युनानी, सिद्ध आणि आधुनिक वैद्यक यांसारख्या सर्व वैद्यकीय शाखांना भारतीय कायद्यात स्वतंत्र स्थान व मान्यता प्राप्त आहे. प्रत्येक शाखेचे शैक्षणिक अभ्यासक्रम, उपचार पद्धती आणि कार्यक्षेत्र निश्चित केले गेले आहेत. त्यामुळे प्रत्येक वैद्यकीय शाखेने आपल्या कार्यक्षेत्रात राहूनच रुग्णांवर उपचार करणे आवश्यक आहे. अपुरे प्रशिक्षण किंवा अधिकृत पात्रता नसताना दुसऱ्या शाखेतील उपचार करण्यास परवानगी देणे हे रुग्णांच्या सुरक्षिततेसाठी धोकादायक ठरू शकते. BHMS-CCMP नोंदणीचा प्रश्न याच तत्त्वाशी संबंधित आहे. न्यायालयीन प्रक्रियेचा अंतिम निर्णय येईपर्यंत अशा प्रकारची नोंदणी सुरू करणे हे वैद्यकीय व्यवस्थेत गोंधळ निर्माण करणारे ठरू शकते आणि रुग्णांच्या हिताला बाधा पोहोचवू शकते, असे IMA ने स्पष्ट केले आहे.

संघटनेने सांगितले की, प्रत्येक नागरिकाला सुरक्षित, वैज्ञानिक आणि गुणवत्तापूर्ण उपचार मिळणे हा त्याचा मूलभूत हक्क आहे. ज्या वैद्यकीय पद्धतीचा उपचार दिला जात आहे, त्या पद्धतीचे संपूर्ण शिक्षण, प्रशिक्षण व कायदेशीर पात्रता असलेल्या डॉक्टरांकडूनच तो उपचार झाला पाहिजे. रुग्णाच्या जीवाशी कोणतीही तडजोड होऊ नये, हीच आमची भूमिका आहे. सुरू करण्यात आलेले आंदोलन हे कोणत्याही वैद्यकीय शाखेविरोधात नसून रुग्ण सुरक्षा, वैद्यकीय शिक्षणातील वैज्ञानिक निकष, वैद्यकीय व्यवसायाची नैतिकता आणि सार्वजनिक आरोग्याचे संरक्षण यासाठी आहे. IMA चा ठाम विश्वास आहे की भारतातील सर्व वैद्यकीय शाखांनी परस्पर सन्मान, सहकार्य आणि आपल्या-आपल्या कार्यक्षेत्राचा आदर राखत समाजाची सेवा करावी. मात्र, एका शाखेतील व्यक्तींना दुसऱ्या शाखेतील उपचार करण्यास परवानगी देणे हा उपाय नसून त्यामुळे रुग्णांच्या आरोग्यावर प्रतिकूल परिणाम होण्याचा धोका वाढतो.