Impact of Doctors' Strike:डॉक्टरांच्या संपाचा फटका! शस्त्रक्रिया पुढे ढकलल्या, तपासण्या रखडल्या; खासगी रुग्णालयांतील रुग्णही अडचणीत

नागपूर शहरातील मेडिकल आणि मेयो शासकीय वैद्यकीय महाविद्यालयांतील निवासी डॉक्टरांच्या संपामुळे रुग्णांना मोठा फटका बसत आहे. या आंदोलनामुळे अनेक महत्त्वाच्या शस्त्रक्रिया आणि वैद्यकीय तपासण्या पुढे ढकलण्यात आल्या आहेत. इंडियन मेडिकल असोसिएशनच्या आवाहनानुसार, खासगी डॉक्टरांनीही त्यांच्या सेवा बंद केल्याने नागपूरमधील रुग्णांची स्थिती गंभीर झाली आहे. रुग्णालयांमध्ये उपचार घेण्यासाठी आलेले अनेक रुग्ण आणि त्यांच्या नातेवाईकांना अडचणींचा सामना करावा लागला आहे. शस्त्रक्रियेसाठी आलेले रुग्ण पुन्हा तारीख घेऊन परत जात आहेत, तर काही रुग्णांनी दिवसभर प्रतीक्षा करूनही उपचार न मिळाल्यामुळे नाराजी व्यक्त केली आहे. तपासण्या रखडल्यामुळे अनेकांना पुन्हा रुग्णालयाच्या फेऱ्या माराव्या लागणार आहेत, ज्यामुळे त्यांचा वेळ आणि पैसा दोन्ही वाया जात आहे.

बीएचएमएस अभ्यासक्रम पूर्ण केलेल्या डॉक्टरांना महाराष्ट्र मेडिकल कौन्सिलमध्ये नोंदणी देण्याच्या प्रस्तावावर विरोध दर्शविणाऱ्या निवासी डॉक्टरांच्या आंदोलनामुळे आरोग्य सेवांवर गंभीर परिणाम झाला आहे. या आंदोलनात खासगी डॉक्टरांचा सहभाग वाढल्याने सरकारी आणि खासगी दोन्ही आरोग्य व्यवस्थेवर ताण आला आहे. मेडिकल आणि मेयो रुग्णालयांमध्ये बाह्यरुग्ण विभागातील सेवा आधीच प्रभावित झाल्या होत्या, आणि आता आंतररुग्ण सेवांवरही याचा परिणाम झाला आहे. रुग्णालयांमध्ये तातडीच्या आणि जीव वाचविणाऱ्या सेवांखेरीज इतर सर्व सेवा बंद ठेवण्यात आल्या आहेत. त्यामुळे रुग्णांना आवश्यक उपचार मिळवण्यासाठी मोठा संघर्ष करावा लागत आहे.