Immediate Action After Bhivandi Incident:भिवंडीतील कोहीनूर दुर्घटनेनंतर आयुक्तांचा धडक निर्णय

ठाणे : भिवंडीतील कोहीनूर इमारत दुर्घटनेची गंभीर दखल घेत महापालिकेचे प्रभारी आयुक्त श्रीकृष्ण पांचाळ यांनी सी-१, सी-२अ आणि सी-२ब प्रवर्गातील सर्व इमारतींचे फेरसंरचनात्मक परीक्षण करण्याचे आदेश दिले आहेत. या निर्णयामुळे शहरातील इमारतींच्या सुरक्षिततेसाठी एक महत्त्वाचा टप्पा ठरला आहे. आयुक्तांनी अधिकाऱ्यांना निर्देश दिले की, चुकीच्या वर्गीकरण करणाऱ्या अधिकाऱ्यांवर कठोर कारवाई केली जाईल. याशिवाय, शहरातील रस्त्यांवरील खड्ड्यांची तातडीने दुरुस्ती करण्याचेही त्यांनी आदेश दिले आहेत. भिवंडी निजामपूर शहर महानगरपालिकेचे आयुक्त अनमोल सागर रजेवर असल्यामुळे या पदाचा प्रभारी पदभार श्रीकृष्ण पांचाळ यांच्याकडे देण्यात आला आहे. गंगाराम वाडी येथे घडलेल्या दुर्घटनेच्या पार्श्वभूमीवर आयुक्तांनी सर्व नियंत्रण अधिकारी आणि विभागप्रमुखांची बैठक घेतली. या बैठकीत आपत्कालीन परिस्थिती आणि रस्त्याच्या दुरावस्थेचा आढावा घेण्यात आला. बैठकीस अतिरीक्त आयुक्त विठ्ठल डाके, उपायुक्त सपना वसावा, उपायुक्त बाळकृष्ण क्षिरसागर, शहर अभियंता जमील पटेल, सहायक संचालक नगररचना अजय साबळे यांच्यासह इतर अभियंते उपस्थित होते.

या बैठकीत धोकादायक इमारतींच्या वर्गवारीचा सखोल आढावा घेण्यात आला. कोहीनूर इमारत सी-२अ म्हणजेच दुरुस्तीयोग्य धोकादायक इमारतींच्या वर्गात होती, याबाबत आयुक्त पांचाळ यांनी नाराजी व्यक्त केली. सी-१ म्हणजेच अतिधोकादायक इमारती, सी-२अ म्हणजे दुरुस्तीयोग्य धोकादायक इमारती आणि सी-२ब म्हणजे संरचनात्मक दुरुस्ती आवश्यक असलेल्या इमारतींचा वर्ग आहे. आयुक्तांनी अतिक्रमण निष्कासन विभागाचे उपायुक्त आणि सहायक संचालक नगररचना यांना सर्व इमारतींची फेर तपासणी करून त्यांचे संरचनात्मक लेखापरिक्षण करण्याचे निर्देश दिले. यामुळे इमारतींच्या वर्गवारीत योग्य बदल करण्यात येईल आणि सुरक्षिततेसाठी आवश्यक ती उपाययोजना करण्यात येईल.