Public Transport Expansion: बेस्टचे १२५ बसमार्ग पुन्हा प्रवासी सेवेत

मुंबईतील सार्वजनिक वाहतूक व्यवस्थेतील सुधारणा आणि विस्ताराच्या दृष्टीने बेस्टने एक महत्त्वाचा निर्णय घेतला आहे. केंद्र सरकारच्या ‘पीएम ई-ड्राइव्ह’ योजनेअंतर्गत १,५०० वातानुकूलित विद्युत मिडी बस मुंबईच्या वाहतूक सेवेत समाविष्ट करण्यात येणार आहेत. या बसांच्या माध्यमातून बंद झालेल्या काही मार्गांचे पुनरुज्जीवन होणार असून, एकूण १२५ नवीन बसमार्ग सुरू करण्यात येणार आहेत. यामुळे सध्या अस्तित्वात असलेल्या ४०० बसमार्गांची संख्या पुढील वर्षाच्या अखेरपर्यंत ५,२५७ पर्यंत वाढेल. विशेषतः या मिडी बसच्या मदतीने अरुंद गल्ल्यांमध्येही बेस्टची सेवा पोहोचवण्याची योजना आहे, ज्यामुळे मुंबईकरांना अधिक सोयीस्कर आणि सुलभ प्रवासाची संधी मिळणार आहे.

बेस्टच्या या उपक्रमामुळे शहरातील सार्वजनिक वाहतूक व्यवस्थेचे आधुनिकीकरण साधण्याचा उद्देश आहे. २०२७ पर्यंत मुंबईत १०,००० बस चालवण्याचे लक्ष्य ठेवण्यात आले आहे, ज्यामध्ये दर १००० लोकसंख्येमागे ०.६ बस असतील. या उद्देशाने बेस्टने ७,००० कोटींच्या १,५०० मिडी विद्युत बस भाडेतत्त्वावर घेण्याचा निर्णय घेतला आहे. या बसांचा टप्प्याटप्प्याने समावेश होणार असून, डिसेंबर २०२६ पर्यंत पहिल्या टप्यातील २५० बस मुंबईत दाखल होण्याची अपेक्षा आहे. या बसांचे आकारमान लहान असल्याने अरुंद रस्त्यांवर आणि दाट लोकवस्तीच्या भागांमध्ये त्यांची वाहतूक अधिक सुलभ होईल. याशिवाय, या बस व्हीलचेअर वापरणाऱ्या दिव्यांग प्रवाशांसाठीही अधिक सुलभ असतील, कारण त्यांची उंची ४०० मिमी इतकी कमी आहे.

नवीन बसांमध्ये प्रगत ‘लिथियम आयर्न फॉस्फेट’ बॅटरी तंत्रज्ञान, संपूर्ण ‘एअर सस्पेंशन’ प्रणाली आणि जलद ‘डायरेक्ट करंट चार्जिंग’ सुविधा असतील. याशिवाय, प्रवासी सुरक्षा आणि परिचालन कार्यक्षमतेला प्राधान्य देण्यासाठी आधुनिक टेलिमॅटिक्सचा समावेश करण्यात आलेला आहे. बसमध्ये ३६०-डिग्री सीसीटीव्ही, ‘इंटेलिजेंट ट्रान्सपोर्ट मॅनेजमेंट सिस्टीम’ आणि आग नियंत्रणासाठी ‘फायर डिटेक्शन अँड सप्रेशन सिस्टीम’ यांचा समावेश आहे. विक्रोळी, भांडुप, कांजूरमार्ग आणि पश्चिम उपनगरांमध्ये या मिडी बसच्या माध्यमातून अरुंद रस्त्यांवर सेवा उपलब्ध होणार आहे, ज्यामुळे प्रवाशांना अधिक सुरक्षित आणि आरामदायक प्रवासाचा अनुभव मिळणार आहे.