Rapid Ride Turns Fatal: रॅपिडो राईड ठरली जीवघेणी! चालकामुळे भीषण अपघात; २० लाखांचं बिल, शरीरावर असंख्य जखमा

बंगळुरूच्या ३२ वर्षीय इंटीरियर डिझायनर सानी कृष्णाचं जीवन १७ जून रोजी एका दुचाकी राईडमुळे पूर्णपणे बदललं. रॅपिडोच्या बाईक ड्रायव्हरच्या निष्काळजीपणामुळे सानी एका भीषण अपघातात सापडली. या अपघातामुळे तिला केवळ शारीरिक दुखापतच झाली नाही, तर तिच्या कुटुंबावर २० लाखांच्या कर्जाचा भारही पडला आहे. सानीने सोशल मीडियावर आपलं दुःख व्यक्त करत रॅपिडोच्या सुरक्षा दाव्यांवर प्रश्न उपस्थित केले आहेत. केरळच्या सानीने १७ जूनच्या सकाळी आपल्या घरातून डोमलूर येथील ऑफिसला जाण्यासाठी रॅपिडो बुक केली होती. तिने कंपनीच्या सुरक्षेच्या दाव्यांवर विश्वास ठेवला, परंतु एक किलोमीटर पुढे गेल्यावर चालकाने भरधाव वेगात ट्रॅक्टरला ओव्हरटेक करण्याचा प्रयत्न केला. या निष्काळजीपणामुळे बाइकवर नियंत्रण सुटले आणि सानी रस्त्यावर पडली, ज्यानंतर ट्रॅक्टर तिच्यावरून गेला. या अपघातानंतर तिला तात्काळ रुग्णालयात दाखल करण्यात आले, जिथे तिच्यावर अनेक शस्त्रक्रिया करण्यात आल्या. तिच्या बरगड्या तुटल्या आणि चेहऱ्यावर गंभीर जखमा झाल्या. सानीच्या उपचारांचा खर्च २० लाखांपेक्षा जास्त झाला आहे, ज्यामुळे तिचं कुटुंब आर्थिक संकटात सापडलं आहे.

अपघातानंतर सानीने ४ ऑगस्ट रोजी इन्स्टाग्रामवर एक व्हिडीओ शेअर करून रॅपिडोच्या भूमिकेवर तीव्र टीका केली. तिने म्हटले की, "रॅपिडो आपल्या 'वुमन सेफ्टी' फीचर्सच्या जाहिरातीत कोट्यवधी रुपये खर्च करतं. मी त्यांच्यावर विश्वास ठेवला, पण ट्रॅक्टरखाली चिरडल्यानंतर कंपनीने मला एकटं सोडलं. जेव्हा मी रॅपिडोला कायदेशीर नोटीस पाठवली, तेव्हा त्यांनी त्याकडे दुर्लक्ष केलं आणि फक्त ऑटोमेटेड ईमेल्स पाठवले." सानीने स्पष्ट केले की, ती या प्रकरणाला ग्राहक न्यायालयात नेणार आहे, जेणेकरून रॅपिडो सारख्या कंपन्यांना प्रवाशांच्या सुरक्षेबद्दल जबाबदार ठरवता येईल. तिचा व्हिडीओ सोशल मीडियावर व्हायरल झाला असून, अनेक युजर्सनी तिच्या अनुभवाबद्दल आपले विचार व्यक्त केले आहेत. याच दरम्यान, रॅपिडोने स्पष्टीकरण देताना सांगितले की, ते सानीच्या संपर्कात आहेत, परंतु सानीने या दाव्याला फेटाळून लावले आहे.