Ethanol in Aviation Fuel: विमानाच्या इंधनात इथेनॉल मिसळलं जाणार?

भारताने इथेनॉल आणि पेट्रोल यांचं मिश्रण असलेल्या इंधनाच्या उत्पादनाकडे लक्ष केंद्रित केलं आहे. यामध्ये इथेनॉलच्या उत्पादन क्षमतेत वाढ होत असल्याचं दिसून येत आहे, परंतु केंद्र सरकारच्या E20 इथेनॉल-मिश्रित पेट्रोल धोरणावर टीका देखील मोठ्या प्रमाणात केली जात आहे. आम आदमी पक्षाचे अध्यक्ष अरविंद केजरीवाल यांनी याबाबत एक महत्त्वाचा दावा केला होता. त्यांनी म्हटलं होतं की, केंद्र सरकार विमानाच्या इंधनात इथेनॉल मिसळण्याची योजना आखत आहे. त्यांच्या या दाव्यावर अनेकांनी प्रश्न उपस्थित केले, परंतु केंद्र सरकारने यावर खुलासा करत केजरीवालांचा दावा फेटाळून लावला आहे. केंद्रीय नागरी उड्डाण मंत्री राम मोहन नायडू यांनी स्पष्ट केलं की, विमानाच्या इंधनात इथेनॉल मिसळण्याची कोणतीही योजना नाही. त्यांनी याबाबतची माहिती इंडियन एक्स्प्रेसला दिली. मंत्री नायडू यांनी सांगितलं की, 'विमानाच्या इंधनात इथेनॉल मिसळण्याचा दावा खोटा आणि बेजबाबदार आहे. इथेनॉल आणि सस्टेनेबल एव्हिएशन फ्युएल (SAF) यामध्ये मोठा फरक आहे. त्यामुळे या गोष्टींमध्ये गल्लत करू नये.' विमानाचं इंधन हे आंतरराष्ट्रीय मानकांसह सुरक्षिततेच्या कडक चाचण्या पार करणारे आहे, असे त्यांनी स्पष्ट केले. प्रवाशांची सुरक्षा सरकारसाठी सर्वोच्च प्राथमिकता असल्याचं त्यांनी सांगितलं.

अरविंद केजरीवाल यांनी केंद्र सरकारच्या E20 इथेनॉल-मिश्रित पेट्रोल धोरणावर जोरदार टीका केली होती. त्यांनी म्हटलं होतं की, टर्बाइन इंधनामध्ये इथेनॉल मिसळण्याची योजना असल्यास, यामुळे विमानांच्या सुरक्षिततेवर गंभीर परिणाम होऊ शकतात. केजरीवाल यांचा हा दावा केंद्र सरकारने फेटाळून लावला आहे. माजी मुख्यमंत्री केजरीवाल यांनी मंगळवारी पंतप्रधानांच्या निवासस्थानासमोर इथेनॉल-मिश्रित पेट्रोलच्या विरोधात मोर्चा काढला होता. या आंदोलनात आम आदमी पक्षाचे अनेक वरिष्ठ नेते आणि कार्यकर्ते सहभागी झाले होते. यावेळी बोलताना त्यांनी अमेरिकेचे राष्ट्राध्यक्ष डोनाल्ड ट्रम्प यांच्या दबावाखाली येऊ नका आणि देशातील जनतेवर E20 पेट्रोल लादू नका, अशी मागणी केली. त्यांनी पेट्रोल पंपांवर ग्राहकांना E20 आणि सामान्य पेट्रोल यामध्ये कोणतं इंधन घ्यायचं, याचा पर्याय उपलब्ध करून देण्याची आवश्यकता व्यक्त केली.