Strange Demands of Accused in Nagpur Case:नागपूर अल्पवयीन बलात्कार प्रकरणातील आरोपीचे नखरे

नागपूरमध्ये एका १६ वर्षीय मुलीच्या अपहरण आणि बलात्काराच्या प्रकरणात आरोपीने अनेक विचित्र मागण्या केल्या आहेत. पोलिसांच्या माहितीनुसार, आरोपीने कोठडीत असताना पिझ्झा, प्रीमियम जेवण, मऊ गादी आणि मच्छर अगरबत्तीची मागणी केली आहे. त्याचबरोबर, त्याने लॉकअपच्या अस्वच्छ भिंती आणि शौचालयाबाबतही तक्रार केली आहे. हुडकेश्वर पोलिसांनी आरोपीला अटक केली असून त्याच्यावर हत्येचा प्रयत्न आणि पोक्सो कायद्याच्या अंतर्गत गंभीर गुन्हे दाखल करण्यात आले आहेत. सोमवारी रात्री, एका वरिष्ठ सरकारी अधिकाऱ्याच्या १६ वर्षांच्या मुलीला नागपूरच्या दिघोरी भागातील एका भाड्याच्या फ्लॅटमधून सुटका करण्यात आली. या मुलीला २४ तासांहून अधिक काळ ओलीस ठेवण्यात आले होते. तिच्यावर वारंवार बलात्कार करण्यात आला, या घटनेचं व्हिडीओ रेकॉर्डिंग करण्यात आलं, तिला चाबकाने मारहाण करण्यात आली आणि चाकूने वार करून जखमीही करण्यात आलं. तपास अधिकाऱ्यांनी दिलेल्या माहितीनुसार, आरोपीने अल्पवयीन मुलीला अमली पदार्थ असलेलं चॉकलेट दिलं होतं, ज्यामुळे तिच्यावर दीर्घकाळ लैंगिक अत्याचार करण्यात आले आणि तिला ब्लॅकमेल करण्यात आलं. आरोपीने या अत्याचाराचे व्हिडीओ बनवल्याचंही पोलिसांनी सांगितलं आहे. त्याच्याकडून पीडितेचे आक्षेपार्ह फोटो आणि व्हिडीओ हस्तगत करण्यात आले आहेत. आरोपीने मेडिकल टेस्ट करण्यास नकार दिला असून, त्याने स्वतःचा मोबाईल आणि पीडितेच्या मोबाईलचा पासवर्ड सांगण्यासही नकार दिला आहे. दोन्ही फोन आरोपीच्याच ताब्यात होते. सध्या आरोपी पोलिसांना तपासात अजिबात सहकार्य करत नाही. हुडकेश्वर पोलीस ठाण्याच्या एका अधिकाऱ्याने दिलेल्या माहितीनुसार, आरोपी लॉकअपमधील परिस्थितीबाबत सतत कुरबुर करत आहे. सध्या पोलीस या प्रकरणाचा सखोल तपास करत असून अपहरण, बलात्कार, व्हिडीओ रेकॉर्डिंग, ब्लॅकमेलिंग अशा अनेक गंभीर आरोपांची चौकशी केली जात आहे.