Promises of American-like Roads: अमेरिकेसारखे रस्ते देण्याचा वादा होता...!

उत्तर प्रदेशातील लखनऊ-कानपूर एक्सप्रेसवेच्या उद्घाटनानंतर सत्ताधाऱ्यांनी अमेरिकेसारख्या रस्त्यांचा दावा केला होता. मात्र, या रस्त्याची गुणवत्ता चांगली असल्याचे सांगणारे दावे अवघ्या १८ ते २० दिवसांतच धुळीला मिळाले आहेत. उद्घाटनानंतर ८४ ठिकाणी रस्ता खचल्याने या प्रकल्पाच्या गुणवत्तेवर प्रश्नचिन्ह निर्माण झाले आहे. सध्या सोशल मीडियावर एक व्हिडिओ व्हायरल झाला आहे, ज्यामध्ये दुरुस्त केलेला डांबरी रस्ता सुकवण्यासाठी पंखे वापरण्यात आले आहेत. या घटनेमुळे उत्तर प्रदेशातील राजकारणात चांगलीच खळबळ माजली आहे. समाजवादी पक्षाचे अध्यक्ष अखिलेश यादव यांनी या व्हिडिओवरून भाजप सरकारवर तीव्र टीका केली आहे. त्यांनी म्हटले की, 'ही भाजपच्या प्रगतीची नवी हवा आहे! ज्या रस्त्याचे उद्घाटन काही दिवसांपूर्वीच झाले, तो वाळवण्यासाठी पंखे लावावे लागत आहेत, हे हास्यास्पद आहे.' अखिलेश यादव यांनी यावरून भाजप सरकारच्या कामकाजावर गंभीर प्रश्न उपस्थित केले आहेत. त्यांनी 'अटल प्रोग्रेस-वे' योजनेवरही टीका केली, ज्यामध्ये त्यांनी बांधकामाच्या दर्जावर गंभीर आरोप केले आहेत.

या एक्सप्रेसवेची लांबी ६३ किलोमीटर असून यावर ४,७०० कोटी रुपये खर्च करण्यात आले आहेत, म्हणजेच प्रति किलोमीटर ७५ कोटी रुपये. मात्र, अवघ्या १८ दिवसांत कानपूर लेनवर ३९ ठिकाणी आणि लखनऊ लेनवर ४५ ठिकाणी रस्ता खचला आहे. ३० जुलै रोजी एक मालवाहू ट्रक या रस्त्यावर खचला होता, ज्यामुळे NHAI ने तात्काळ दुरुस्ती केली, परंतु १२ तासांतच तिथे भेगा पडल्या. या संदर्भात दैनिक भास्करने वृत्त दिले आहे. या रस्त्याच्या दुरुस्तीच्या कामासाठी पंखा वापरण्याची हास्यास्पद बाब समोर आली आहे, ज्यामुळे प्रवाशांच्या सुरक्षेवर प्रश्नचिन्ह निर्माण झाले आहे.