Donation Scam at Siddhivinayak Temple: सिद्धिविनायक मंदिरातील देणगी घोटाळा उघडकीस आला

सिद्धिविनायक मंदिरातील देणगी घोटाळा आता चर्चेचा विषय बनला आहे. अयोध्येत राम मंदिराच्या देणगी अपहार प्रकरणानंतर मुंबईतील सिद्धिविनायक मंदिरातही देणगी चोरीच्या घटनांचा उलगडा झाला आहे. सुरुवातीला काही कर्मचाऱ्यांनी व्हीआयपी दर्शनासाठी भाविकांकडून पैसे घेतल्याच्या तक्रारींची चौकशी सुरू झाली होती. मात्र, या तपासात देणगीपेटीतून पैसे चोरीला जात असल्याचा प्रकार उघडकीस आला. या प्रकरणामुळे राज्यात राजकीय वातावरण तापले आहे. महाराष्ट्र नवनिर्माण सेनेचे अध्यक्ष राज ठाकरे यांनी आरोप केला आहे की, मंदिरातून दरवर्षी १८ कोटी रुपयांची अफरातफर होत आहे. तथापि, मंदिर प्रशासनाने या आरोपांना नकार दिला असून, संबंधित आरोपींना पकडून चोरीला आळा घातल्याचा दावा केला आहे.

इंडियन एक्स्प्रेसच्या वृत्तानुसार, सिद्धिविनायक मंदिराचे विश्वस्त राहुल लोंढे यांनी स्पष्ट केले की, २०२३ च्या अखेरीस नवीन विश्वस्त मंडळाची स्थापना झाल्यानंतर व्हीआयपी दर्शनासाठी पैसे घेणाऱ्या कर्मचाऱ्यांचा शोध घेण्यासाठी सीसीटीव्ही फुटेज तपासण्यात आले. यावेळी काही कर्मचाऱ्यांनी देणगीपेटीतून पैसे चोरताना दिसल्याने पोलिसांना माहिती देण्यात आली आणि आरोपींना अटक करण्यात आली. मंदिरात भाविकांची संख्या वाढत असतानाही देणगीचे उत्पन्न स्थिर राहिल्याने विश्वस्तांना संशय आला. त्यानंतर लाचलुचपत प्रतिबंधक विभागाची मदत घेतली गेली. तपासादरम्यान देणगी मोजण्याच्या प्रक्रियेवर विशेष लक्ष ठेवण्यात आले. याच काळात एका दिवशी देणगी मोजणीच्या ठिकाणचा सीसीटीव्ही कॅमेरा झाकल्याचं आढळलं, ज्यामुळे संशय अधिक बळावला.