Leadership in GSI: नागपूरच्या वर्षा आगलावेंच्या नेतृत्वाखाली जीएसआयमध्ये ऐतिहासिक बदल

नागपूर: भारतीय भूवैज्ञानिक सर्वेक्षण (जीएसआय) या संस्थेच्या महासंचालकपदी नागपूरच्या वर्षा अशोक आगलावे यांनी नुकतीच पदभार स्वीकारला आहे. जीएसआयच्या १७६ वर्षांच्या इतिहासात महासंचालकपदाची धुरा सांभाळणाऱ्या त्या पहिल्या महिला अधिकारी ठरल्या आहेत. आगलावे यांचा हा ऐतिहासिक टप्पा त्यांच्या कारकिर्दीतील एक महत्त्वाचा क्षण आहे. त्यांनी असित साहा यांच्यानंतर या पदावर कार्यभार स्वीकारला असून, त्यांच्या नेतृत्वात जीएसआयच्या कार्यपद्धतीत नवे वळण येणार आहे. वर्षा आगलावे यांचा जन्म नागपूरमध्ये झाला असून, त्यांच्या या यशामुळे उपराजधानी नागपूरच्या शिरपेचात आणखी एक मानाचा तुरा रोवला आहे. आगलावे यांनी भारतीय खाण ब्युरोमध्ये काम केल्यानंतर १९९२ मध्ये जीएसआयमध्ये प्रवेश केला. त्यांच्या कारकिर्दीत त्यांनी वैज्ञानिक आणि प्रशासकीय क्षेत्रात तीन दशकांहून अधिक अनुभव मिळवला आहे. पुराजीवशास्त्र आणि परागकणशास्त्र या क्षेत्रांमध्ये त्यांनी विशेष संशोधन केले आहे. त्यांच्या संशोधनात उशिरा क्रिटेशस ते पॅलिओसीन कालखंडातील गाळाचे थर, क्रिटेशस-टर्शरी सीमारेषा आणि सातपुडा-गोंडवाना खोऱ्यांचा समावेश आहे.

आगलावे यांचे योगदान मध्य भारतातील सालबर्डी-घोरपेंड परिसरात डायनासोरच्या घरट्याच्या शोधात महत्त्वपूर्ण ठरले आहे. त्यांनी मिशिगन विद्यापीठासह विविध आंतरराष्ट्रीय संशोधन संस्थांसोबत पुराजीवशास्त्राच्या क्षेत्रात कार्य केले आहे. जीएसआयच्या महासंचालकपदी त्यांच्या नेत्यत्त्वात महत्त्वपूर्ण खनिजांचा शोध घेणे, जमिनीखालील अदृश्य खनिजसाठे शोधणे, प्रगत भूभौतिकीय सर्वेक्षण करणे, समुद्रातील खनिजांचा शोध घेणे आणि प्रयोगशाळांची पायाभूत सुविधा सक्षम करणे यावर विशेष लक्ष केंद्रित केले जाईल. आगलावे यांच्या नेतृत्वामुळे जीएसआयच्या कार्यपद्धतीत नवे विचार आणि दृष्टिकोन येणार आहेत, ज्यामुळे संस्थेची कार्यक्षमता वाढेल.