No Compromise with Goan Identity: गोव्याच्या अस्मितेशी तडजोड नाही!

गोव्यातील रेल्वे दुपदरीकरणाच्या मुद्द्यावरून पुन्हा एकदा वातावरण तापले आहे. वेळसाव येथे रेल्वे दुपदरीकरणाविरोधात सुरू असलेल्या आंदोलनात गोवा फॉरवर्डचे अध्यक्ष विजय सरदेसाई यांनी ग्रामस्थांच्या लढ्याला ठाम पाठिंबा दिला. यावेळी काँग्रेस प्रदेशाध्यक्ष अमित पाटकर आणि स्थानिक नागरिकांसोबत सरदेसाई आंदोलनात सामील झाले. स्थानिकांनी या प्रकल्पामुळे त्यांच्या जमिनी, घरं आणि पर्यावरणावर होणाऱ्या परिणामाबद्दल चिंता व्यक्त केली आहे. सरदेसाई यांनी स्पष्ट केले की, गोव्याच्या लोकांच्या हितासाठी आवश्यक असलेले प्रकल्प स्वीकारले जातील, परंतु गोव्याच्या अस्मितेला धोका निर्माण करणारे प्रकल्प नकोत. त्यांनी सोशल मीडियावरही याबाबतची माहिती दिली आणि गोवा फॉरवर्ड पक्षाने प्रत्येक गोवा-विरोधी प्रकल्पाविरोधात उभे राहण्याची ग्वाही दिली.

वेळसाव, पाले आणि केळशी परिसरातील रेल्वे दुपदरीकरणाच्या कामावरून स्थानिक नागरिक आणि रेल्वे प्रशासनामध्ये वाद सुरू आहे. ग्रामस्थांचा दावा आहे की, दुपदरीकरणासाठी वापरण्यात येणाऱ्या जमिनीची मालकी अद्याप स्पष्ट झालेली नाही. रेल्वे विकास निगम लिमिटेडने (RVNL) योग्य जमीन संपादन न करता खासगी जमिनीवर काम केल्याचा आरोप स्थानिकांनी केला आहे. एप्रिल २०२६मध्ये जमीनमालकांनी या प्रकरणाच्या सुनावणीसाठी हजेरी लावली होती, परंतु सुनावणी वारंवार पुढे ढकलली जात असल्याने ग्रामस्थांमध्ये नाराजी वाढली आहे. विजय सरदेसाई, अमित पाटकर आणि इतर कार्यकर्त्यांनी ग्रामस्थांना पाठिंबा देत या आंदोलनात सक्रिय सहभाग घेतला आहे.