Quick Fasting Snack: उपवासासाठी झटपट चिवडा तयार करा!

उपवासाच्या काळात आहारावर काही मर्यादा असतात, त्यामुळे काय खावे आणि काय बनवावे याबाबत विचार करण्यात वेळ जातो. उपवासाच्या दिवशी दुपारी किंवा संध्याकाळी चहा घेत असताना काही कुरकुरीत आणि चविष्ट फराळी पदार्थ असले, तर उपवासाचा थकवा लगेच दूर होतो. बाजारातून विकत आणलेला चिवडा खाण्यापेक्षा घरच्या घरी साजूक तुपात किंवा शेंगदाण्याच्या तेलात बनवलेला गरमागरम चिवडा खाण्याची मजा काही औरच असते. तळलेले बटाटे, कुरकुरीत साबुदाणा, मसालेदार शेंगदाणे आणि विविध मसाल्यांचा उत्तम संगम असलेला हा चिवडा लहानांपासून मोठ्यांपर्यंत सर्वांना आवडतो. बटाटा, शेंगदाणे, खोबरे, काजू आणि उपवासाला चालणारे इतर पदार्थ वापरून हा चिवडा कमी वेळात तयार करता येतो. थोडासा तिखट, खमंग आणि कुरकुरीत असलेला हा चिवडा उपवासाच्या काळात मधल्या वेळेस किंवा चहासोबत स्नॅक्स म्हणून खाण्यासाठी उत्तम आहे. एकदा तयार केल्यास, गरजेनुसार थोडा-थोडा खाता येतो. उपवासाच्या फराळात काहीतरी हटके आणि चटपटीत खायचं असल्यास, हा चिवडा एकदम परफेक्ट पर्याय ठरतो. घरच्या घरी उपवासासाठी खास चिवडा कसा बनवायचा याची सोपी रेसिपी पुढीलप्रमाणे आहे.

या चिवड्यासाठी लागणारे साहित्य: २ कप नायलॉन साबुदाणा, १ कप मखाणे, १ कप साजूक तूप किंवा तेल, १ कप शेंगदाणे, १०-१२ काप केलेले बदाम, १०-१२ काजू, १ कप कच्च्या बटाट्याचा किस, ४-५ हिरव्या मिरच्या, १०-२० कडीपत्त्याची पाने, चवीनुसार सैंधव मीठ, १/२ टेबलस्पून जिरेपूड, १/२ टेबलस्पून आमचूर पावडर, आणि १/२ टेबलस्पून पिठीसाखर. सर्वप्रथम बटाटे स्वच्छ धुवून त्यांची साल काढून पातळ काप करून घ्या. हे काप पाण्याने २-३ वेळा धुवून कापडावर वाळवून घ्या. नंतर बटाट्याचा किस तेलात खरपूस तळून घ्या. नंतर नायलॉन साबुदाण्यावर थोडं पाणी शिंपडून १०-१५ मिनिटांसाठी झाकून ठेवा आणि गरम तेलात तळून घ्या. एका कढईत मखाणे भाजून घ्या.