Preference for Premium Buses:लांब पल्ल्याच्या प्रवासासाठी ७० टक्के तरुण-नोकरदारांची प्रीमियम बसला पसंती

मुंबई : लांब पल्ल्याच्या प्रवासासाठी तरुण व्यावसायिक आणि नोकरदारांमध्ये प्रीमियम बसला मोठा प्रतिसाद मिळत आहे. खासगी चारचाकी किंवा विमानाच्या तुलनेत, प्रीमियम बस प्रवासाचे एक आकर्षक साधन बनले आहे. या प्रवासात आरामदायक सुविधा, डिजिटल तंत्रज्ञानाचा वापर आणि स्वतः गाडी चालवण्याच्या तणावापासून दूर राहण्याची संधी यामुळे ७० टक्के तरुणांनी प्रीमियम बसला पसंती दिली आहे. 'इंट्रसिटी स्मार्टबस इंटरसिटी मोबिलिटी सर्व्हे २०२६' या सर्वेक्षणानुसार, देशभरातील १३,३२० नागरिकांनी यामध्ये सहभाग घेतला आहे. या सर्वेक्षणात १८ ते ४३ वर्षे वयोगटातील जवळपास ७४.३ टक्के प्रवासी आणि ६५.९ टक्के पगारदार व्यावसायिकांचा समावेश आहे. हे दर्शविते की, आंतरशहरी प्रवासाच्या स्वरूपात महत्त्वपूर्ण बदल होत आहेत.

सर्वेक्षणात असे दिसून आले आहे की, निम्म्याहून अधिक प्रवाशांकडे स्वतःचे वाहन आहे, तरीही ३०.४ टक्के लोक आंतरशहरी प्रवासासाठी स्वतःचे वाहन चालवण्यास प्राधान्य देत नाहीत. ४००-६०० किमीच्या प्रवासासाठी खर्च समान असताना, जवळपास ६९.६ टक्के प्रवाशांनी प्रीमियम शेअर्ड बसला पसंती दिली आहे. यामध्ये रेल्वे किंवा विमानाच्या तुलनेत प्रीमियम बस अधिक आकर्षक ठरली आहे. प्रवासाच्या तंत्रज्ञानाबद्दल ८२.४ टक्के प्रतिसादकांनी महत्त्व व्यक्त केले आहे. ऑनलाइन तिकीट बुकिंग, सुलभ डिजिटल उपलब्धता, आरामदायक बसमधील सुविधा आणि खासगी वाहनातील ताण टाळणे यामुळे प्रीमियम बसचा प्रवास अधिक आकर्षक बनला आहे.