Court Ruling on Gokul Dairy:गोकुळ दूध संस्थांच्या मतदानाचा मार्ग मोकळा

कोल्हापूर : गोकुळ दूध उत्पादक संघाच्या ६४४ सभासद संस्थांना प्रशासनाने अवसायनात काढले होते. या निर्णयाविरोधात सहकारी दूध संस्थांनी मुंबई उच्च न्यायालयाच्या कोल्हापूर सर्किट बेंचकडे दाद मागितली होती. न्यायालयाने या प्रकरणाची सुनावणी काल घेतली आणि आज निकाल देत या संस्थांना पात्र ठरवले. त्यामुळे अवसायनात काढलेल्या सर्व संस्थांच्या मतदानाच्या हक्काचा मार्ग आता मोकळा झाला आहे. या निकालामुळे सरकारी अधिकाऱ्यांच्या खांद्यावर बंदूक ठेवून लढणाऱ्या अदृश्य शक्तींना उच्च न्यायालयाने एक मोठा धक्का दिला आहे. सहायक निबंधक दुग्ध कृष्णा ठाकरे यांनी दिलेल्या अवसायनातील संस्थांबाबतच्या आदेशांना न्यायालयाने नैसर्गिक न्यायाच्या तत्त्वांचा भंग मानला. मुंबई उच्च न्यायालयाच्या कोल्हापूर सर्किट बेंचचे न्यायमूर्ती शैलेश ब्रह्मे यांनी हा महत्वपूर्ण निकाल दिला. या प्रकरणात ज्येष्ठ विधिज्ञ ॲड. श्रीनिवास पटवर्धन, ॲड. भूषण मंडलिक, ॲड. प्रबोध पाटील, ॲड. धैर्यशील पवार आणि सरकारच्या वतीने ॲड. सतीश तळेकर यांनी काम पाहिले. निकाल जाहीर होताच या संस्थांच्या प्रतिनिधींनी सहनिबंधक कार्यालयासमोर गुलालाची उधळण करून फटाके वाजवून विजयोत्सव साजरा केला.

गोकुळच्या दूध संस्थांच्या अवसायनामुळे या संस्थांचे संचालक व मतदानाचा हक्क धोक्यात आला होता. याविरोधात संस्थांनी न्यायालयात धाव घेतली होती. न्यायालयाने अवसायनाचा आदेश रद्द करत संस्थांना मोठा दिलासा दिला आहे. सर्वोच्च न्यायालयाने गोकुळ दूध संघाची निवडणूक प्रक्रिया राबवण्याचे आदेश दिल्यानंतर सहकार विभागाची यंत्रणा गतिमान झाली आहे. गोकुळ दूध संघाच्या निवडणुकीसाठी सभासद संस्थांची अंतिम यादी निश्चित करणारा कालबद्ध कार्यक्रम बुधवारी जाहीर करण्यात आला आहे. यानुसार गोकुळ दूध संघासाठी प्राथमिक दूध संस्थांची ठराव धारकांची प्राथमिक मतदार यादी १२ ऑगस्टला जाहीर करण्यात येणार आहे. यावर २१ ऑगस्टपर्यंत हरकती घेता येणार आहेत. हरकतीबाबत अंतिम निर्णय ३१ ऑगस्ट रोजी होणार आहे. अंतिम यादी ४ सप्टेंबर रोजी जाहीर केली जाणार आहे. त्यामुळे गोकुळ दूध संघाच्या निवडणूक प्रक्रियेला आता खऱ्या अर्थाने गती आली आहे.