Ticket holders with RAC:आरएसी तिकीटधारकांना संपूर्ण बेडरोल मिळणार

रेल्वेच्या एसी डब्यात आरएसी (रद्द आरक्षणावर आधारित आरक्षण) तिकिटावर प्रवास करणाऱ्या प्रवाशांना आता कन्फर्म तिकीटधारकांप्रमाणे संपूर्ण बेडरोल किट देणे अनिवार्य करण्यात आले आहे. रेल्वे बोर्डाने या संदर्भात सर्व विभागीय रेल्वे कार्यालयांना स्पष्ट आदेश दिले आहेत. यामुळे आरएसी तिकिटधारकांना देखील प्रवासाच्या दरम्यान आवश्यक असलेल्या सर्व सुविधा उपलब्ध होणार आहेत. यापूर्वी अनेक प्रवाशांनी तक्रार केली होती की, आरएसी तिकिटावर प्रवास करताना त्यांना लिनेन किंवा बेडरोल मिळत नाही. या समस्येची दखल घेत, रेल्वे बोर्डाने तातडीने उपाययोजना केल्या आहेत. यामुळे आता सर्व आरएसी प्रवाशांना समान सुविधा मिळणार आहे, ज्यामुळे त्यांचा प्रवास अधिक आरामदायक होईल.

आरएसी तिकिटावर एका बर्थवर दोन प्रवासी प्रवास करत असले तरी, दोन्ही प्रवाशांना स्वतंत्रपणे पूर्ण बेडरोल किट दिले जाईल. यामुळे सहप्रवाशासोबत बेडरोल किंवा ब्लँकेट शेअर करण्याची गरज भासणार नाही. बेडरोल संचामध्ये २ बेडशीट (चादरी), १ ब्लँकेट (कंबल), १ उशी, उशीचे कव्हर आणि १ फेस टॉवेल यांचा समावेश असेल. या सुविधेमुळे प्रवाशांना अधिक आरामदायक प्रवास अनुभवता येईल. रेल्वेने प्रवाशांना सूचित केले आहे की, जर त्यांना बेडरोल किट मिळाले नाही, तर त्यांनी टीटीईशी संपर्क साधावा किंवा रेल मदत हेल्पलाइनवर तक्रार नोंदवावी.