Slow Progress on Marathwada Liberation Day Decisions:मराठवाडा मुक्ती दिनाच्या निर्णयांची संथगती

छत्रपती संभाजीनगर: मराठवाडा मुक्ती संग्राम दिनानिमित्त आयोजित मंत्रिमंडळ बैठकीतील निर्णयांची अंमलबजावणी अत्यंत संथ गतीने होत असल्याचा आरोप शिवसेना नेते अंबादास दानवे यांनी केला आहे. त्यांनी नुकतेच मुख्यमंत्री देवेंद्र फडणवीस यांना याबाबत निवेदन सादर केले. यामध्ये त्यांनी स्पष्ट केले की, पूर्वीच्या मंत्रिमंडळ बैठकीत सिंचन प्रकल्पांसाठी २१ हजार कोटी रुपयांची मान्यता देण्यात आली होती, परंतु या निर्णयानंतर एकही हेक्टर क्षेत्राचे सिंचन वाढलेले नाही. मोठ्या घोषणांची कामे प्रत्यक्षात पुढे सरकलेली नाहीत. याबाबतच्या मुद्द्यावर चर्चा करण्यासाठी विभागीय आयुक्त जी. श्रीकांत यांच्या कार्यालयात शुक्रवारी दुपारी तीन वाजता एक आढावा बैठक आयोजित करण्यात आली आहे.

या बैठकीत सिंचन प्रकल्प आणि नदीजोड प्रकल्पांचा आढावा घेण्यात येणार आहे. उर्ध्व पेनगंगा, बाभळी मध्यम प्रकल्प, उनकेश्वर, पोटा, जोड परळी, ममदापूर, पिंपळगव कुटे उच्च पातळी बंधाऱ्यांच्या कामांची प्रगती कशी आहे याबाबत प्रश्न उपस्थित केले जात आहेत. निम्न दुधना प्रकल्प, वाकोद मध्यम प्रकल्प, गिरीजा-वाकोद बंदनलिकेद्वारे पाणीपुरवठा, अंबड प्रवाही वळण योजना, शनिदेव उच्च पातळी बंधारा याबाबत निर्णय घेण्यात आले होते. तथापि, दानवे यांनी मुख्यमंत्र्यांना दिलेल्या निवेदनात म्हटले आहे की, या सर्व कामांची गती अत्यंत संथ आहे. मराठवाडा मुक्ती दिनानिमित्त होणाऱ्या आढावा बैठकीत घेतले जाणारे निर्णय आणि त्यांची प्रगती जनतेसमोर ठेवावी, अशी मागणी दानवे यांनी केली आहे.