Agnishikha Flower: तमिळनाडूचे राज्य फूल आता बीडच्या डोंगरात फुलले

बीड जिल्ह्यातील आष्टी तालुक्यातील बीडसांगवीच्या डोंगरांमध्ये सध्या एक अद्वितीय आणि आकर्षक वनस्पती फुलली आहे, जी 'अग्निशिखा' म्हणून ओळखली जाते. या फुलाला तमिळनाडूचे राज्य फूल आणि झिम्बाब्वेचे राष्ट्रीय फूल म्हणून मान्यता प्राप्त आहे. पावसाळ्यात या परिसरात हिरवागार वातावरण निर्माण होते, ज्यामुळे अग्निशिखाच्या लाल, नारिंगी आणि पिवळ्या रंगाच्या फुलांचे सौंदर्य अधिक खुलते. या दुर्मीळ फुलांचे दर्शन घेण्यासाठी पर्यटक आणि निसर्गप्रेमी मोठ्या संख्येने येथे येत आहेत. अग्निशिखा या वनस्पतीचे एक विशेष वैशिष्ट्य म्हणजे तिच्या फुलांचा रंग बदलणे. हे फूल सुरुवातीला पिवळे असते, नंतर नारिंगी आणि शेवटी गडद लाल रंग धारण करते. फुलाच्या पाकळ्या मागे वळलेल्या असतात, ज्यामुळे त्या अग्नीतल्या ज्वालांसारख्या दिसतात. याच कारणामुळे या वनस्पतीला 'अग्निशिखा' किंवा 'कळलावी' असे नाव मिळाले आहे.

पर्यावरणप्रेमी अमोल दिवटे यांच्या मते, महाराष्ट्रात अग्निशिखा ही वनस्पती दिवसेंदिवस दुर्मीळ होत चालली आहे. बीडसांगवी परिसरात या वनस्पतीचे अस्तित्व आढळणे म्हणजे येथे जैवविविधतेचा समृद्ध वारसा आहे. या परिसरातील नैसर्गिक अधिवासाचे संरक्षण करणे आणि दुर्मीळ वनस्पतींचे संवर्धन करणे अत्यंत आवश्यक आहे. आष्टीचे वनपरिक्षेत्र अधिकारी अमोल मुंडे यांनी सांगितले की, आष्टी तालुक्यातील डोंगराळ भागात अनेक आयुर्वेदिक आणि दुर्मीळ वनस्पती आढळतात, ज्यात काही विशेषतः पश्चिम महाराष्ट्र आणि सह्याद्री घाट परिसरात आढळतात. या नैसर्गिक संपदेचे जतन करण्यासाठी अनियंत्रित चराई रोखणे, स्थानिक नागरिकांमध्ये जनजागृती करणे आणि संवर्धनाला प्राधान्य देणे आवश्यक आहे.