Salary Increase for Pilots:एअर इंडियाने वैमानिकांच्या पगारात वाढ जाहीर केली

मुंबई: एअर इंडियाने आपल्या अनुभवी वैमानिकांना कंपनीत टिकवून ठेवण्यासाठी आणि नव्या वैमानिकांना आकर्षित करण्याच्या उद्देशाने त्यांच्या पगारात ८ ते १५ टक्क्यांपर्यंत वाढ करण्याची घोषणा केली आहे. या नव्या वेतनरचनेत वैमानिकांच्या करिअर प्रगतीवर विशेष लक्ष देण्यात आले आहे. एअर इंडिया एक्स्प्रेसमधील फर्स्ट ऑफिसर्सना आता प्रथम कमांडर पदावर बढती दिली जाणार आहे, ज्यामुळे त्यांना एअर इंडियाच्या वाइड-बॉडी विमानांच्या ताफ्यात सामील होण्याची संधी मिळेल. वाइड-बॉडी विमानांवर काम करणाऱ्या वैमानिकांना तुलनेने अधिक वेतन मिळते, त्यामुळे कंपनीने वैमानिकांना स्पष्ट करिअर मार्ग उपलब्ध करून देण्याचा निर्णय घेतला आहे. यामुळे एअर इंडिया समूहात वैमानिकांची संख्या वाढवण्याचा प्रयत्न केला जात आहे.

एअर इंडिया एक्स्प्रेसला अधिक आकर्षक बनविण्यासाठी हा निर्णय महत्त्वाचा ठरतो. विशेषतः बोइंग ७३७ विमानांच्या ताफ्यात वैमानिकांची कमतरता असल्याने, कंपनीने वेतन आणि करिअरच्या संधींमध्ये सुधारणा करण्याचा निर्णय घेतला आहे. यामुळे अनुभवी कॉकपिट क्रूला कायम ठेवणे हे कंपनीचे उद्दिष्ट आहे. सध्या एअर इंडियाच्या वैमानिकांना महिन्याला ४० तासांच्या उड्डाणाची हमी वेतन व्यवस्था आहे, म्हणजे प्रत्यक्षात ४० तासांपेक्षा कमी उड्डाण झाल्यासही त्यांना किमान वेतन मिळते. नव्या व्यवस्थेत ही ४० तासांची हमी कायम ठेवण्यात आली आहे, परंतु ४० तासांनंतरच्या उड्डाणासाठी फ्लाइंग अलाउन्सचे दर वाढविण्यात आले आहेत, ज्यामुळे अधिक तास उड्डाण करणाऱ्या वैमानिकांना त्यांच्या कामानुसार अतिरिक्त मोबदला मिळणार आहे.