Actor Rajpal Yadav in Trouble:राजपाल यादवच्या अडचणी वाढल्या

बॉलीवूड अभिनेता राजपाल यादवच्या अडचणी कमी होताना दिसत नाहीत. काही महिन्यांपूर्वी चेक बाऊन्स प्रकरणामुळे त्याला तिहार तुरुंगात आत्मसमर्पण करावे लागले होते. त्यानंतर तो काही काळ तिथे राहिला, पण आता त्याच्या अडचणी पुन्हा एकदा वाढल्या आहेत. उत्तर प्रदेशातील शहाजहानपूरमध्ये त्याच्या दोन मालमत्तांचा लिलाव होणार असल्याची माहिती समोर आली आहे. 'सेंट्रल बँक ऑफ इंडिया, मुंबई'ने या संदर्भात नोटीस जारी केली आहे. एनडीटीव्हीच्या वृत्तानुसार, बँकेने शहरातील आणि गावातील या दोन्ही मालमत्तांवर लिलावाची प्रक्रिया सुरू केली आहे. राजपाल यादवने 'अता पता लापता' या चित्रपटासाठी बँकेकडून कर्ज घेतले होते, परंतु कर्जाची परतफेड न केल्यामुळे बँकेने मालमत्ता ताब्यात घेतली आहे. सध्या राजपाल यादववर बँकेचे १६ कोटी ६१ लाख ६४ हजार रुपयांचे कर्ज थकीत आहे, तर या दोन मालमत्तांची एकूण किंमत ३ कोटी १९ लाख २६ हजार रुपये असल्याचे सांगितले जात आहे.

राजपाल यादवच्या शहाजहानपूरमधील दोन मालमत्तांपैकी एक शहरात आणि दुसरी गावात आहे. या मालमत्तांमध्ये एक शेत आणि एक घर समाविष्ट आहे. लिलाव ९ सप्टेंबर रोजी ऑनलाइन पद्धतीने होणार असल्याचे वृत्त आहे. कर्जासाठी राजपाल यादवने पत्नी राधा यादव आणि आई गोदावरी यादव यांची मालमत्ताही गॅरंटर म्हणून गहाण ठेवली होती. त्यामुळे बँकेने या मालमत्तांवर कारवाई सुरू केली आहे. राजपाल यादववर चेक बाऊन्सचा गुन्हा दाखल करणाऱ्या कंपनीचे मालकही शहाजहानपूरचे रहिवासी आहेत. यामुळे या प्रकरणात आणखी गुंतागुंतीची स्थिती निर्माण झाली आहे.