Meeting with Modi: राष्ट्रवादी शरद पवार गटाचे खासदार पंतप्रधान मोदींची उद्या भेट घेणार

मुंबई: राष्ट्रवादी काँग्रेस (शरद पवार) पक्षाचे आठ खासदार सोमवारी सकाळी अकरा वाजता संसदेत पंतप्रधान नरेंद्र मोदी यांची भेट घेणार आहेत. या भेटीचा उद्देश राज्यातील विविध समस्यांवर चर्चा करणे आहे, अशी माहिती पक्षाच्या कार्याध्यक्षा खासदार सुप्रिया सुळे यांनी दिली. त्यांनी स्पष्ट केले की, सध्याच्या परकीय योगदान (एफसीआरए) सुधारणा विधेयकाला आमचा विरोध आहे. या विधेयकात आवश्यक सुधारणा करण्यात याव्यात, अन्यथा हे विधेयक मागे घेण्यात यावे किंवा संयुक्त समितीकडे पाठवले जावे, अशी आमची मागणी आहे. स्वयंसेवी संस्थांना मिळणाऱ्या परकीय मदतीबाबत हे विधेयक महत्त्वाचे आहे. जर डर्टी मनी किंवा अंमली पदार्थांच्या व्यापारासाठी पैसा येत असेल, तर तो थांबवला पाहिजे. पण शिक्षण, आरोग्य आणि समाजकार्यासाठी येणाऱ्या निधीवर कोणतीही बंधने येऊ नयेत, अशी मागणी सुळे यांनी केली.

दिल्लीतील जंतर-मंतरवर विद्यार्थ्यांच्या आंदोलनाच्या दरम्यान पॅलेट गनचा वापर कसा झाला, लाठीमार का झाला आणि आंदोलन कसे हाताळले गेले याचा तपास विशेष तपास पथकाने करावा, अशी मागणी सुळे यांनी केली. त्यांनी सांगितले की, सरसंघचालकांनी जेन-झी म्हणजेच नवी पिढी प्रामाणिक आणि देशभक्त असल्याचे प्रमाणपत्र दिले आहे. या पिढीला सीबीआय, ईडी किंवा अन्य कोणत्याही केंद्रीय यंत्रणांची भीती नाही. त्यामुळे लवकरच ही तरुण पिढी सरकार चले जावच्या घोषणा देईल, असेही त्यांनी नमूद केले.