Unique Interview: विवेक कुमावत यांच्या १८ वर्षांच्या कलासाधनेचा अनोखा आविष्कार

विवेक कुमावत, एक प्रतिभावान चित्रकार, गेली १८ वर्षे नंदी बैलाला आपल्या कलाकृतींचा केंद्रबिंदू बनवून भारतीय संस्कृती, अध्यात्म आणि पौराणिक परंपरेचा अनोखा आविष्कार साकारत आहेत. त्यांच्या दृष्टिकोनानुसार, नंदी हा भगवान शिवाचे वाहन नसून, तो सामर्थ्य, श्रद्धा, भक्ती, सहनशीलता आणि सकारात्मक ऊर्जा यांचे प्रतीक आहे. अलीकडेच त्यांनी लोकमतचे चेअरमन डॉ. विजय दर्डा आणि व्यवस्थापकीय संचालक देवेन्द्र दर्डा यांची भेट घेतली. या भेटीत कुमावत यांनी आपल्या चित्रशैलीवर चर्चा केली आणि सांगितले की, ग्रामीण वातावरणात बालपण गेल्यामुळे बैलाशी त्यांचा भावनिक संबंध निर्माण झाला. बैलाची भव्यता, शांतता आणि निष्ठा यामुळे त्याला ‘नंदी’च्या दिव्य स्वरूपात चित्रित केले आहे. त्यांच्या चित्रांमध्ये नंदी कधीही थकलेला किंवा ओझ्याखाली दबलेला दिसत नाही, तर तो जीवनाचा उत्सव साजरा करतो. कुमावत यांच्या कलाकृतींमध्ये नंदी भगवान शिवांना प्रेमाने नृत्य करण्यास आमंत्रित करत असल्याचे भासवतात.

कुमावत यांच्या चित्रांमध्ये शिवलीला, समुद्रमंथन, गणेशाची निर्मिती यासारख्या पौराणिक कथा प्रत्यक्ष रेखाटलेल्या नसून, त्या नंदीच्या शरीरावरील अलंकारिक आकृत्या, रेषा आणि रंगसंगतीद्वारे प्रतीकात्मक स्वरूपात व्यक्त केल्या आहेत. त्यामुळे नंदी भारतीय पौराणिक परंपरेचा जिवंत वाहक बनतो. कुमावत यांचे उद्दिष्ट आहे की, त्यांच्या चित्रांद्वारे पाहणाऱ्यांना आनंद, शांतता आणि सकारात्मक ऊर्जा मिळावी. नंदी हा भारतीय संस्कृतीचा चिरंतन दूत असून, त्याच्या माध्यमातून भारतीय परंपरेचे सौंदर्य जागतिक स्तरावर पोहोचवण्याचा त्यांचा प्रयत्न आहे.