Pune FDA Action: पुण्यातील हॉटेल-रेस्टॉरंट्सना ‘एफडीए’चा दणका! २४ जणांना अटक, १४ आस्थापना सील

पुणे शहरात अन्न व औषध प्रशासनाने ‘सेफ फूड, सेफ ड्रग, सेफ महाराष्ट्र’ या मोहिमेअंतर्गत १ ते ९ ऑगस्ट दरम्यान विविध ठिकाणी केलेल्या तपासणीत १२ आस्थापनांचे परवाने तात्काळ निलंबित करण्यात आले. या कारवाईत मोठ्या प्रमाणात प्रतिबंधित अन्नपदार्थांचा साठा जप्त करण्यात आला आहे. या तपासणीच्या दरम्यान, अन्न सुरक्षा प्रशासनाने ४१.३६ लाख रुपयांचा प्रतिबंधित अन्नसाठा जप्त केला. या कारवाईत २४ व्यक्तींना अटक करण्यात आली असून १४ अन्न आस्थापना सील करण्यात आल्या आहेत. याशिवाय, चार वाहनेही जप्त करण्यात आली असून जप्त केलेल्या वाहनांची किंमत सुमारे १४ लाख ९० हजार रुपये असल्याचे प्रशासनाने स्पष्ट केले आहे.

पुणे विभागात अन्न व औषध प्रशासनाच्या पथकाने एक विशेष तपासणी केली असता, एका वाहनामध्ये विनापरवाना विक्रीसाठी मावा स्वीटची वाहतूक होत असल्याचे आढळून आले. या साठ्यातून अन्नपदार्थाचा नमुना विश्लेषणासाठी घेण्यात आला आहे. उर्वरित साठ्यातून ९८ किलो मावा स्वीट जप्त करण्यात आला असून त्याची किंमत ९ लाख ८८ हजार ४०० रुपये आहे. प्रशासनाने व्यावसायिकांना नियमांचे पालन करण्याचे आवाहन केले आहे.

अन्न सुरक्षा प्रशासनाने हॉटेल, रेस्टॉरंट आणि बेकरी व्यावसायिकांना ग्राहकांना मोफत आणि शुद्ध पिण्याचे पाणी उपलब्ध करून देणे, अन्नपदार्थांसाठी योग्य दर्जाचे ‘फूड ग्रेड’ साहित्य वापरणे, विनापरवाना व्यवसाय न करणे, वापरलेले तेल पुन्हा वापरू नये आणि मेन्यू कार्डवर दिशाभूल करणारी माहिती देऊ नये, असे निर्देश दिले आहेत. या कारवाईमुळे पुण्यातील खाद्यपदार्थांच्या सुरक्षिततेसाठी एक महत्त्वाचा संदेश दिला गेला आहे. प्रशासनाच्या या कठोर कारवाईमुळे नागरिकांना सुरक्षित अन्न मिळविण्यात मदत होईल, अशी अपेक्षा आहे.