Boost for Eco-Tourism:गोव्यात इको-टुरिझमला वेग!

गोवा वन विकास महामंडळाच्या १२२ व्या संचालक मंडळाच्या बैठकीत पर्यावरण संरक्षण, शाश्वत वन व्यवस्थापन आणि इको टुरिझमच्या विकासावर विशेष लक्ष केंद्रित करण्यात आले. या बैठकीत, आमदार दिव्या राणे यांच्या अध्यक्षतेखाली प्रशासकीय, आर्थिक आणि विकासात्मक मुद्द्यांवर सखोल चर्चा झाली. यामध्ये प्रधान मुख्य वनपाल कमल दत्ता, व्यवस्थापकीय संचालक के. रमेश कुमार, महाव्यवस्थापक अमर हेबळेकर यांच्यासह अन्य संचालक मंडळाचे सदस्य उपस्थित होते. बैठकीच्या प्रारंभात मागील बैठकीच्या निर्णयांची मंजुरी देण्यात आली, त्यानंतर महामंडळाच्या आर्थिक स्थितीचा आढावा घेण्यात आला. चालू प्रकल्पांची प्रगती आणि आगामी योजनांवर सविस्तर चर्चा झाली. इको टुरिझम क्षेत्रात नव्या संधी शोधण्याबरोबरच विद्यमान प्रकल्पांचा दर्जा उंचावण्यासाठी आवश्यक उपाययोजनांवर चर्चा करण्यात आली. यावेळी राज्यातील वनक्षेत्राचा समतोल राखत पर्यटनाला चालना देण्याचा दृष्टिकोन अधोरेखित करण्यात आला.

दिव्या राणे यांनी गोव्यातील वनसंपत्तीचे संरक्षण आणि शाश्वत विकास साधण्यासाठी महामंडळ कटिबद्ध असल्याचे स्पष्ट केले. त्यांनी सांगितले की, इको-टुरिझमला चालना देणे, स्थानिकांना रोजगाराच्या संधी निर्माण करणे आणि पर्यावरणाचा समतोल राखणे ही महामंडळाची प्रमुख उद्दिष्टे आहेत. पारदर्शक आणि उत्तरदायी प्रशासनाच्या माध्यमातून विकासकामे अधिक प्रभावीपणे राबविण्यावर भर दिला जाणार असल्याचे त्यांनी नमूद केले. इको-टुरिझम क्षेत्रात गुंतवणूक वाढवून राज्यातील नैसर्गिक संपत्तीचा शाश्वत उपयोग करण्यावर बैठकीत विशेष लक्ष केंद्रित करण्यात आले. खासगी भागीदारीच्या माध्यमातून पायाभूत सुविधा उभारणी, पर्यटकांसाठी आधुनिक सुविधा उपलब्ध करणे आणि स्थानिक मार्गदर्शक व सेवा क्षेत्रातील रोजगारवाढ यासाठी ठोस आराखडा तयार करण्याचा निर्णय घेण्यात आला.