Raghav Chadha Meets PM Modi:आधी टीका, आता केले कौतुक

आम आदमी पक्षातून भारतीय जनता पक्षात प्रवेश केल्यानंतर राघव चड्ढा यांनी शुक्रवारी पंतप्रधान नरेंद्र मोदी यांची भेट घेतली. या भेटीत त्यांनी पंतप्रधान मोदींच्या मार्गदर्शनाबद्दल आभार व्यक्त केले. चड्ढा यांनी सोशल मीडियावर पोस्ट करताना म्हटले की, 'ही सकाळ माझ्यासाठी सदैव अविस्मरणीय राहील. माननीय पंतप्रधान नरेंद्र मोदीजी यांची भेट घेण्याचे भाग्य मला लाभले. त्यांनी आपला मौल्यवान वेळ दिल्याबद्दल मी अत्यंत कृतज्ञ आहे.' चड्ढा यांचा भाजपामध्ये प्रवेश झाल्यानंतर त्यांची भूमिका बदलली आहे. विरोधात असताना त्यांनी भाजपावर टीका केली होती, परंतु आता सत्ताधारी पक्षात असल्याने त्यांनी सरकारच्या बाजूने काम करण्याचा निर्णय घेतला आहे.

राघव चड्ढा यांनी एप्रिलमध्ये आम आदमी पक्ष सोडून भाजपामध्ये प्रवेश केला. त्यांच्या नेतृत्वाखाली, आपच्या सात खासदारांनी भाजपामध्ये प्रवेश केला, ज्यामध्ये अशोक मित्तल आणि संदीप पाठक यांचा समावेश होता. भाजपामध्ये सामील झाल्यानंतर चड्ढा यांची राज्यसभेतील भूमिका देखील बदलली आहे. २० मेपासून त्यांची कमिटी ऑन पेटिशन्सच्या अध्यक्षपदी नियुक्ती करण्यात आली आहे. चड्ढा यांनी त्यांच्या भूमिकेवर बोलताना सांगितले की, 'आता समस्या मांडण्यापेक्षा त्यावर तोडगा काढण्यावर आपला भर आहे.'