Lashkar Commander Dies Mysteriously: २६/११ चा सूत्रधार अब्दुल अझीझचा गूढ मृत्यू

मुंबईतील २६/११ च्या दहशतवादी हल्ल्यातील प्रमुख सूत्रधार असलेल्या लष्कर-ए-तोयबाच्या कमांडर अब्दुल अझीझचा गूढ मृत्यू झाला आहे. पाकिस्तानच्या इस्लामाबादमध्ये कुबा मशिदीच्या प्रवेशद्वाराजवळ तो अचानक कोसळला आणि त्याचा तिथेच मृत्यू झाला. त्याच्या मृत्यूच्या कारणाबाबत अद्याप कोणतीही स्पष्ट माहिती उपलब्ध नाही. स्थानिक माध्यमांच्या रिपोर्टनुसार, अझीझने मशिदीत नमाज अदा करण्यापूर्वी एका हॉटेलमध्ये जेवण केले होते. जेवणानंतर तो मशिदीच्या बाहेर पोहोचताच अचानक जमिनीवर कोसळला. तिथे उपस्थित लोकांनी त्याला तातडीने रुग्णालयात नेले, परंतु डॉक्टरांनी त्याला मृत घोषित केले. अद्याप त्याच्या मृत्यूचे कारण स्पष्ट झालेले नाही, परंतु काही लोकांनी अन्नातून विषप्रयोग करून त्याला मारण्यात आले असावे, असा संशय व्यक्त केला आहे. स्थानिक प्रशासनाने या शक्यतेला नकार दिला नाही, तर अचानक हृदयविकाराचा झटका आल्याने त्याचा मृत्यू झाला असावा, असा अंदाज वर्तवला जात आहे. पाकिस्तानी अधिकाऱ्यांनी या घटनेबाबत अद्याप कोणतेही अधिकृत विधान केलेले नाही.

अब्दुल अझीझ हा लष्कर-ए-तोयबाच्या दहशतवादी संघटनेतील एक महत्त्वाचा कमांडर होता. त्याने मुंबईत झालेल्या दहशतवादी हल्ल्याच्या कटात महत्त्वाची भूमिका बजावली होती. लष्कर-ए-तोयबाचा प्रमुख म्हणून त्याने दहशतवाद्यांमधील संवाद यंत्रणा सांभाळली आणि चकमकीत मारल्या गेलेल्या दहशतवाद्यांच्या कुटुंबांना आर्थिक मदत पोहोचवण्याची जबाबदारी घेतली होती. २६/११ च्या हल्ल्यातील त्याची भूमिका अत्यंत महत्त्वाची होती, ज्यामुळे त्याला दहशतवादाच्या जगात एक प्रमुख व्यक्तिमत्व मानले जात होते. त्याच्या गूढ मृत्यूमुळे लष्कर-ए-तोयबाच्या कार्यपद्धतीवर प्रश्नचिन्ह उपस्थित झाले आहे.