Construction Approval Files Exposed:कल्याण डोंबिवली पालिकेच्या नगररचना विभागात गैरव्यवहार उघड

कल्याण – कल्याण डोंबिवली पालिकेच्या नगररचना विभागात सुरू असलेल्या गैरकारभाराच्या प्रकरणांबाबत अनेक तक्रारी शासनस्तरावर, विधिमंडळात आणि लाचलुचपत प्रतिबंधक विभागाकडे दाखल झाल्या आहेत. यावरून नगररचना विभागातील अधिकाऱ्यांची मनमानी थांबण्याची चिन्हे दिसत नाहीत. काही दिवसांपूर्वी नगररचना कार्यालयातील वास्तुविशारदांनी दाखल केलेल्या बांधकाम मंजुरीच्या सुमारे ५० नस्ती एका अभियंत्याने कार्यालयीन वेळेत बाहेर नेल्याचा धक्कादायक प्रकार समोर आला आहे. या घटनेमुळे नगररचना विभाग पुन्हा एकदा विकासक, वास्तुविशारद आणि स्थानिक नागरिकांच्या टीकेचा सामना करीत आहे. गेल्या दोन वर्षांपासून इमारत बांधकाम मंजुरीच्या नस्त्या गायब होत असल्याच्या तक्रारी वाढत आहेत. यावर आमदारांनी विधिमंडळात प्रश्न उपस्थित केले आहेत आणि लाचलुचपत प्रतिबंधक विभागाच्या महासंचालकांकडे याबाबत तक्रार दाखल करण्यात आली आहे. तक्रार करणाऱ्यांमध्ये जाणते नागरिक जितेंद्र पुसाळकर यांचा समावेश आहे.

शासनाच्या नगरविकास विभागाकडे कल्याण डोंबिवली पालिका नगररचना विभागातील बांधकाम मंजुरी नस्तींसंदर्भात अनेक तक्रारी दाखल झाल्या आहेत. या तक्रारींचा तपास सुरू असतानाही नगररचना विभागातील अधिकारी आपल्या वरिष्ठांच्या आदेशांना जुमानत नसल्याने विकासक आणि वास्तुविशारदांमध्ये असंतोष वाढत आहे. दोन दिवसांपूर्वी नगररचना विभागातील अभियंता दीपक मोरे यांनी नगररचना विभागातील शिपायांच्या मदतीने दोन पिशव्या इमारत बांधकाम मंजुरीच्या नस्त्या मुख्यालयाच्या तळ मजल्यावर आणल्या. या नस्त्या कार्यालयीन वेळेत बाहेर नेण्यात आल्या असल्याने नजीम अली नावाच्या जमीन मालकाने अभियंता मोरे यांना विचारले. यावर मोरे यांनी उत्तर दिले की, 'तुझी फाईल यामध्ये आहे का ते पहिले बघ.' या घटनेचा व्हिडिओ समाज माध्यमांवर व्हायरल झाला आहे.