BJP Candidate Selection: आमदार राजेश वानखडेंची रवी राणांवर टीका

अमरावती: तिवसा मतदारसंघातील राजकारणात बदल होणार असल्याच्या विधानानंतर युवा स्वाभिमान पक्षाचे आमदार रवी राणा यांच्यावर भाजपच्या आमदार राजेश वानखडे यांनी तीव्र टीका केली आहे. वानखडे यांनी रवी राणांना स्पष्ट इशारा देताना सांगितले की, भाजपची उमेदवारी तुमच्या सांगण्यावरून दिली जात नाही, त्यामुळे थापा मारणे थांबवा. त्यांनी पत्रकार परिषदेत बोलताना रवी राणांच्या राजकारणातील खोटेपणावर जोरदार भाष्य केले. वानखडे म्हणाले की, रवी राणांचे राजकारण खोटारडेपणा, बनावट कामे आणि वैचारिक गोंधळ यावर आधारित आहे. भाजपच्या तिवसा गटात लुडबूड करण्याचा प्रयत्न तुम्ही करीत आहात, हे आम्ही सहन करणार नाही. महापालिका निवडणुकीत तुम्ही केलेली बेईमानी आम्हाला विसरता येणार नाही, आणि त्याचे परिणाम तुम्हाला भोगावे लागतील, असा इशारा त्यांनी दिला.

राजेश वानखडे यांनी रवी राणांना सांगितले की, तुम्ही उमेदवारी जाहीर होईपर्यंत कोणकोणते गेम खेळले, याची आम्हाला माहिती आहे. भाजपच्या उमेदवारीसाठी तुमच्या सांगण्यावर अवलंबून राहण्याची गरज नाही. महायुतीचा धर्म निभावण्याची गरज आहे आणि आमच्या पक्षात लुडबुड करू नका, असे त्यांनी स्पष्ट केले. रवी राणा यांना त्यांनी सुचवले की, कुठल्या मतदारसंघात बदल होणार, हे जनतेने ठरवले आहे आणि त्याबाबत योग्य वेळ येईल तेव्हा उत्तर मिळेल.