Murder for Revenge?: खून का बदला खून? जामिनावर सुटलेल्या खून प्रकरणातील आरोपीची दगडाने ठेचून हत्या

नागपूरमध्ये खुनाच्या गुन्ह्यात जामिनावर सुटलेल्या तरुणाची निर्घृण हत्या करण्यात आली आहे. प्रतिक राजू कारंडेकर (वय २०, रा. पारडी) असे या तरुणाचे नाव आहे. शुक्रवारी सकाळी त्याचा मृतदेह सिम्बायोसिस कॉलेजच्या मागील जंगलात रक्ताच्या थारोळ्यात आढळून आला. या घटनेमुळे परिसरात एकच दहशत पसरली होती. प्रतिकवर खुनाचा आरोप होता आणि तो जामिनावर बाहेर आला होता. गेल्या वर्षी, २०२५ मध्ये एचबी टाऊन परिसरात एका व्यक्तीचा खून झाला होता, त्यात प्रतिक आणि त्याचे तीन साथीदार अटक करण्यात आले होते. सुमारे दोन महिन्यांपूर्वी प्रतिक आणि त्याचे सहआरोपी जामिनावर सुटले होते.

गुरुवारी सायंकाळी प्रतिक घरातून मोटारसायकलवर बाहेर गेला. रात्री उशिरापर्यंत तो घरी परतला नाही, त्यामुळे त्याच्या कुटुंबीयांनी चिंता व्यक्त केली. शुक्रवारी सकाळी त्याचा मृतदेह झुडपांमध्ये आढळल्याने पोलिसांना आणि कुटुंबीयांना धक्का बसला. वाठोडा पोलिसांनी तात्काळ घटनास्थळी धाव घेतली. प्रारंभिक तपासात पोलिसांना माहिती मिळाली की, गुरुवारी रात्री प्रतिक काही मित्रांसोबत त्या परिसरात दिसला होता. त्याने आणि त्याच्या मित्रांनी मद्यपान केल्यानंतर त्यांच्यात वाद झाला. वादाच्या दरम्यान, आरोपींनी प्रतिकवर दगडाने हल्ला केला आणि त्याची हत्या केली.