Murder of Chief Minister's PA:मुख्यमंत्र्यांच्या वैयक्तिक सहाय्यकाची हत्या

पश्चिम बंगालच्या मुख्यमंत्री शुभेंदु अधिकारी यांचे निकटवर्ती सहकारी चंद्रनाथ रथ यांच्या हत्येच्या प्रकरणात सीबीआयने महत्त्वाची कारवाई केली आहे. या प्रकरणात ११ आरोपींविरोधात न्यायालयात चार्जशीट दाखल करण्यात आली आहे. विशेष म्हणजे, चंद्रनाथ रथ यांच्या कार्यालयात कार्यरत असलेल्या भाजपच्या दोन कार्यकर्त्यांनी, सागर सोनकर आणि साहिब सोनकर यांनीच या हत्येचा कट रचला होता. निवडणूक निकालानंतर दोन दिवसांनी, म्हणजेच ६ मे रोजी मध्यमग्राम येथे चंद्रनाथ रथ यांची गोळ्या झाडून हत्या करण्यात आली. रथ हे शुभेंदु अधिकारी यांचे वैयक्तिक सहाय्यक होते आणि भवानीपूर मतदारसंघातील त्यांच्या निवडणूक प्रचाराची संपूर्ण जबाबदारी त्यांनी घेतली होती. सीबीआयच्या तपासात समोर आले आहे की, या हत्येचा कट डिसेंबर २०२५ पासूनच रचला जात होता, परंतु विविध कारणांमुळे हत्येची तारीख अनेक वेळा पुढे ढकलली गेली. सीबीआयला मिळालेल्या माहितीनुसार, सागर सोनकर याने या हत्येची संपूर्ण योजना तयार केली होती आणि उत्तर प्रदेशातील शूटरना हत्येची सुपारी दिली होती. सागरने या हत्येसाठी आवश्यक पैशांची व्यवस्था केली होती. त्याचा लहान भाऊ साहिब सोनकर याच्यावर या कटात सहभागी असल्याचा आरोप आहे. सागर हा २०२० पर्यंत एका विरोधी पक्षाच्या आमदाराकडे कार्यरत होता, त्यानंतर तो भाजपमध्ये सामील झाला. सीबीआय आता या प्रकरणात राज्यातील एका प्रतिस्पर्धी पक्षाच्या पदाधिकाऱ्याच्या भूमिकेचीही चौकशी करत आहे. सीबीआयने आतापर्यंत उत्तर प्रदेशातील ६ शूटरना अटक केली आहे. यामध्ये मोनू सिंह, राज सिंह, गोलू सिंह, मयंक राज मिश्रा, विक्की मौर्या आणि नवीन कुमार सिंह यांचा समावेश आहे. यातील राज सिंह उर्फ राज कुमार सिंह हा मुख्य शूटर असून त्याला राज्याच्या सीमेवरून पकडण्यात आले होते. याशिवाय, सुपारी घेणारे विनय राय, संजय राय आणि विकास मिश्रा यांनाही अटक करण्यात आली आहे. विकास मिश्रा हा मुख्य सूत्रधार असून तो परराज्यातून आणलेल्या शूटर यांच्यातील महत्त्वाचा दुवा होता. या प्रकरणातील एक आरोपी अद्याप फरार आहे. कोलकाताच्या श्यामपुकुरच्या जोडाबागान भागात सोनकर कुटुंबाची सहावी पिढी राहत असून या भागात त्यांच्या कुटुंबातील ७० हून अधिक सदस्य राहतात. या कुटुंबाचा प्रवास डाव्या पक्षांच्या विरोधात काँग्रेसपासून सुरू झाला आणि पुढे तृणमूल काँग्रेसशी त्यांचे संबंध जोडले गेले. सागरने २०११ ते २०१८ या काळात तत्कालीन तृणमूल काँग्रेस आमदार शशी पांजा यांच्या कार्यालयात काम केले होते. २०२१ मध्ये भाजपमध्ये प्रवेश केल्यानंतर त्याची भेट चंद्रनाथ रथ यांच्याशी झाली आणि रथ यांनी त्याला शुभेंदु अधिकारी यांच्या वैयक्तिक कार्यालयातील कामाची जबाबदारी दिली होती.