Discussion with Chief Minister for Fast-Tracking Minor Assault Case:नागपूर: अल्पवयीन अत्याचार खटला जलद गतीने चालवण्यासाठी मुख्यमंत्र्यांशी चर्चा

नागपूर: हुडकेश्वर पोलीस हद्दीत एक अत्यंत गंभीर घटना घडली आहे, ज्यात शासकीय अधिकाऱ्याच्या मुलीचे अपहरण करून तिच्यावर लैंगिक अत्याचार करण्यात आला. या प्रकरणात आरोपी निर्भय उर्फ आकाश माधव पाखरे याने खोटे बोलून अल्पवयीन मुलीला जाळ्यात ओढले. त्याने तिचा भ्रमणध्वनी हॅक केला आणि मैत्रीच्या बहाण्याने तिला भेटण्यासाठी बोलावून अपहरण केले. तिला एका खोलीत बंद करून तिच्यावर पाशवी अत्याचार केला. पोलिसांनी वेळेत हस्तक्षेप केला नसता, तर मुलीचा जीव गेला असता. या गंभीर घटनेची दखल घेत, मुख्यमंत्री देवेंद्र फडणवीस यांच्याशी चर्चा करून नरसापूरच्या धर्तीवर जलदगतीने खटल्याचे न्यायालयीन कामकाज चालवण्यासाठी प्रयत्न करणार असल्याचे विधानपरिषद सदस्या डॉ. निलम गोऱ्हे यांनी रविवारी सांगितले.

या घटनेने राज्यभर खळबळ उडवून दिली आहे. विधानपरिषद सदस्या डॉ. गोऱ्हे यांनी रविवारी हुडकेश्वर पोलीस ठाण्यात भेट देऊन या प्रकरणाची माहिती घेतली. यावेळी त्यांनी अतिरिक्त पोलीस आयुक्त नविनचंद्र रेड्डी यांच्याकडून तपासाची माहिती घेतली. पत्रकारांशी संवाद साधताना डॉ. गोऱ्हे म्हणाल्या की, अल्पवयीन मुलीवर झालेल्या अत्याचारानंतर पोलिसांनी सबळ पुरावे सादर करूनही न्यायालयाने आरोपी निर्भय पाखरे याला केवळ दोन दिवसांची पोलीस कोठडी दिली. न्यायाधिशांनी पोलिसांना तपासासाठी इतका कमी वेळ दिला याबद्दल त्यांना खंत वाटते.

आरोपीच्या वैद्यकीय चाचणी आणि डिएनए अहवाल येण्यापूर्वीच वकिलांनी पोलिसांच्या तपासावर आक्षेप घेतल्याने या प्रकरणात मोठ्या शडयंत्राची शंका येत आहे, असे डॉ. गोऱ्हे यांनी नमूद केले. त्यांनी सांगितले की, निर्भय पाखरे हा एकटा आरोपी असला तरी त्याची मोडस ऑपरेंडी गंभीर आहे. मुलीवर अत्याचाराचा कट रचला गेला, तिच्यावर अत्याचारानंतर चित्रिकरण करून खूनाचा प्रयत्न झाला, या सर्व घटनांचा पुरावा आरोपीच्या भ्रमणध्वनीत असण्याची शक्यता आहे. त्यामुळे आरोपीने भ्रमणध्वनीचा गुप्त क्रमांक देत नाही. न्यायवैद्यक प्रयोगशाळेतून त्याची उकल झाल्यानंतर ज्या ठिकाणी हा व्हिडिओ पाठवला गेला, त्या सर्वांना सह आरोपी बनवण्याची गरज आहे, असे त्यांनी स्पष्ट केले. नागपूर आणि भंडारा येथे अशा घटनांची मालिका सुरू आहे, ज्यामुळे राज्यात अल्पवयीनांवर अत्याचाराच्या साथीचा रोग जडला आहे, असे डॉ. गोऱ्हे यांनी सांगितले.