Historic Military Pact: सौदी, पाकिस्तान आणि तुर्की यांचा संयुक्त संरक्षण करार

मध्यपूर्वेत सुरू असलेल्या संघर्षाच्या पार्श्वभूमीवर पाकिस्तान, सौदी अरेबिया आणि तुर्की या तीन देशांनी 'मक्का संयुक्त संरक्षण करार'ावर स्वाक्षरी केली आहे. या ऐतिहासिक करारामुळे तिन्ही देशांमधील लष्करी सहकार्य आणि धोरणात्मक भागीदारी अधिक मजबूत होणार आहे. करारानुसार, या तिन्ही देशांपैकी कोणत्याही एका देशावर झालेला सशस्त्र हल्ला हा तिन्ही देशांवर एकत्रित हल्ला मानला जाईल. पाकिस्तानच्या परराष्ट्र मंत्रालयाने याबाबत माहिती दिली आहे की, या कराराचा मुख्य उद्देश संभाव्य आक्रमणांना थांबवणे आणि लष्करी ताकद वाढवणे आहे. याशिवाय, तिन्ही देशांमधील संरक्षण सहकार्य वाढवण्यावर विशेष लक्ष केंद्रित केले जाईल. करारावर स्वाक्षरी करण्यासाठी सौदी अरेबियात उच्चस्तरीय बैठक आयोजित करण्यात आली होती, ज्यामध्ये सौदीचे क्राउन प्रिन्स मोहम्मद बिन सलमान, तुर्कीचे अध्यक्ष रजब तैयब एर्दोगान आणि पाकिस्तानचे पंतप्रधान शेहबाज शरीफ उपस्थित होते. पंतप्रधान शेहबाज शरीफ हे लष्करप्रमुख फील्ड मार्शल असीम मुनीर यांच्यासह तीन दिवसांच्या सौदी दौऱ्यावर आले होते.

सौदी अरेबियाने इराण आणि त्याच्या प्रादेशिक मित्रगटांकडून होणाऱ्या ड्रोन व क्षेपणास्त्र हल्ल्यांच्या पार्श्वभूमीवर आपल्या संरक्षण भागीदारांमध्ये वाढ करण्याचा निर्णय घेतला आहे. या करारात अणुवस्त्रधारी पाकिस्तान आणि तुर्कीचा समावेश आहे, जो 'नाटो'च्या दुसऱ्या क्रमांकाच्या सर्वात मोठ्या सैन्यबळासह प्रगत संरक्षण क्षमतांचा धनी आहे. तुर्कीच्या 'हाबरतुर्क' वाहिनीने दिलेल्या वृत्तानुसार, या करारामुळे संयुक्त लष्करी सराव, लष्करी प्रशिक्षण, तंत्रज्ञान हस्तांतरण आणि गुप्तचर माहितीची देवाणघेवाण सुकर होणार आहे. यापूर्वी, सप्टेंबर महिन्यात पाकिस्तान आणि सौदी अरेबियाने एकमेकांवर हल्ला हा संयुक्त हल्ला मानण्याचा द्विपक्षीय करार केला होता. तुर्कीचा समावेश झाल्यामुळे या तिन्ही देशांची लष्करी व धोरणात्मक ताकद आणखी वाढणार आहे.