Miraculous Survival:अकाली जन्मलेल्या बाळाला नवे जीवन मिळाले

नागपूर शहरातील वानाडोंगरी येथील शालिनीताई मेघे मदर अँड चाईल्ड हॉस्पिटलमध्ये एक अद्वितीय घटना घडली आहे. जुळ्या मुलांपैकी एक बाळ अवघ्या ६३० ग्रॅम वजनाने जन्माला आले. गर्भधारणेच्या २८ ते २९ व्या आठवड्यात जन्मलेल्या या बाळाला अनेक गंभीर आरोग्य समस्यांचा सामना करावा लागला. जन्मानंतर लगेचच बाळाला श्वास घेण्यात अडचण येऊ लागली, ज्यामुळे त्याला तातडीने नवजात अतिदक्षता विभागात दाखल करण्यात आले. डॉक्टरांनी आणि परिचारिकांनी केलेल्या अथक प्रयत्नांमुळे या बाळाला ८४ दिवसांच्या उपचारानंतर सुखरूप घरी पाठविण्यात आले. हिंगणा तालुक्यातील माला यांना जुळी मुले झाली होती, त्यापैकी एक बाळ अत्यंत कमी वजनाने जन्माला आले. जन्मानंतर बाळाची प्रकृती गंभीर होती, त्यामुळे त्याला तातडीने उपचाराची आवश्यकता होती. श्वास घेण्यास अडचण असल्याने बाळाला दीर्घकाळ श्वसनाच्या सहाय्याची गरज होती. डॉक्टरांनी ६९ दिवसांपर्यंत बाळाला श्वसनाचा आधार दिला. बाळाच्या प्रकृतीत हळूहळू सुधारणा होत गेली आणि अखेर त्याला श्वसनाच्या आधारातून बाहेर काढण्यात यश आले.

उपचारादरम्यान बाळाला अनेक गंभीर अडचणींचा सामना करावा लागला. रक्तातील संसर्ग, वारंवार श्वास थांबण्याचे झटके, तीव्र रक्तक्षय आणि हाडे कमकुवत होण्याची समस्या यांसारख्या विविध गुंतागुंत बाळाला भेडसावल्या. त्याला अनेक वेळा रक्त चढवावे लागले. या सर्व समस्यांवर डॉक्टरांनी सातत्याने उपचार केले. अकाली जन्मलेल्या बाळांमध्ये विविध गुंतागुंत होण्याची शक्यता असते, त्यामुळे बाळाच्या आवश्यक तपासण्या करण्यात आल्या. डोळ्यांच्या पडद्याची तपासणी, श्रवणक्षमता तपासणी आणि मेंदूची सोनोग्राफी करण्यात आली. सर्व तपासण्या सामान्य आल्याने डॉक्टरांनी बाळाची मज्जासंस्था आणि मेंदूचा विकास सामान्य असल्याचे सांगितले.