Record Land Prices in Kharghar:खारघरच्या भूखंडांना विक्रमी दर, प्रतिचौरस मीटर ७.०७ लाखांना विक्री; एकाच व्यवहारात सिडकोला २८३ कोटी

नवी मुंबई : नवी मुंबई आंतरराष्ट्रीय विमानतळाच्या कार्यान्वयनानंतर खारघरच्या सिडको भूखंडांना मोठ्या प्रमाणात मागणी वाढली आहे. नुकत्याच पार पडलेल्या ई-लिलावात खारघर सेक्टर १५ मधील ३,९९९.६२ चौरस मीटर क्षेत्रफळाच्या भूखंडाला ७ लाख ७ हजार रुपये प्रतिचौरस मीटर असा विक्रमी दर मिळाला. या एकाच व्यवहारातून सिडकोच्या तिजोरीत सुमारे २८२ कोटी ७७ लाख रुपये जमा होणार आहेत. खारघरमधील सिडकोच्या भूखंडाला मिळालेला हा सर्वाधिक दर असल्याचे मानले जात आहे. यामुळे या परिसरातील भूखंडांच्या किमतीत मोठी वाढ झाल्याचे स्पष्ट झाले आहे.

सिडकोच्या व्यवस्थापकीय संचालक अश्विन मुद्गल यांच्या कार्यकाळात पहिल्यांदाच नवी मुंबईतील विविध नोडमधील निवासी, वाणिज्यिक तसेच अन्य वापराचे भूखंड ई-लिलावाद्वारे विक्रीसाठी उपलब्ध करण्यात आले होते. खारघर सेक्टर १५ मधील भूखंडासाठी ड्रीम अभिनंदन इन्फ्रा (ड्रीम डेव्हलपर्स) यांनी सर्वाधिक बोली लावली. प्रतिचौरस मीटरच्या दराने सात लाखांचा टप्पा ओलांडल्याने खारघरमधील जमिनीच्या वाढत्या किमती पुन्हा एकदा अधोरेखित झाल्या आहेत. याचबरोबर, खारघर सेक्टर ५ ए मधील एका मोठ्या भूखंडाला सुमारे साडेतीन लाख रुपये प्रतिचौरस मीटरचा दर मिळाला असून, या व्यवहारातून सिडकोला सुमारे ५१४ कोटी रुपये मिळणार आहेत.