Income Tax Refund: आयटीआर भरला, तरी रिफंड अडकला; काय असेल यामागील कारण?

आयकर रिटर्न म्हणजेच आयटीआर भरण्यानंतर करदात्यांना सर्वाधिक अपेक्षा असते ती म्हणजे कर परताव्याची. आयटीआरमध्ये दिलेली माहिती योग्य असल्यास आणि ई-पडताळणी पूर्ण झाल्यास, आयकर विभाग साधारणतः काही दिवसांत रिफंड प्रक्रिया पूर्ण करतो. तथापि, काही विशेष परिस्थितींमध्ये रिफंड प्रक्रियेत अधिक वेळ लागू शकतो. व्यवसायातील उत्पन्न, भांडवली नफा किंवा इतर तपशीलांमुळे अतिरिक्त पडताळणी आवश्यक असल्यास, रिफंड प्रक्रियेत विलंब होऊ शकतो. त्यामुळे रिफंड उशिरा आला म्हणून लगेच चिंतेत पडण्याची गरज नाही. रिफंडची सद्यस्थिती तपासणे हे महत्त्वाचे आहे. याशिवाय, रिफंडची रक्कम ज्या बँक खात्यात जमा होणार आहे, ते खाते वैध आणि प्री-व्हॅलिडेटेड आहे का, हे देखील तपासणे आवश्यक आहे.

आयकर विभागाकडून रिफंड मिळवण्यासाठी संबंधित बँक खाते आयकराच्या ई-फायलिंग प्रणालीवर नोंदणीकृत आणि पूर्व-प्रमाणित असणे आवश्यक आहे. जर खाते पूर्व-प्रमाणित नसेल, तर रिफंड मिळवण्यात अडचणी येऊ शकतात. यासाठी, आयकराच्या ई-फायलिंग पोर्टलवर जाऊन 'माय बँक अकाऊंट' या विभागात जाऊन संबंधित खाते प्राथमिक खाते म्हणून निवडून त्याची पडताळणी करणे आवश्यक आहे. यामुळे रिफंड प्रक्रियेत येणारे मुख्य अडथळे दूर होऊ शकतात. याशिवाय, पॅन, ओळखपत्र आणि बँक खात्यातील नाव जुळत नसल्यास देखील रिफंड प्रक्रियेत अडचण येऊ शकते. त्यामुळे बँकेतील ग्राहक माहिती आणि पॅन कार्डवरील नाव यामध्ये जुळवून घेतल्यास रिफंड प्रक्रियेत येणारे अडथळे दूर होऊ शकतात.